Ուկրաինական ողբերգական իրադարձություններին զուգահեռ պուտինյան-գեբելսյան քարոզչամեքենայի ղեկավար, ռուսաստանցի հայտնի հեռուստամեկնաբան Դմիտրի Կիսելյովի հիմնած «Գրիբոյեդով» ակումբը շարունակում է իր գործունեությունը Երևանում՝ նրա գլխավորությամբ: Ինչպես հայտնի է, ակումբի հայաստանյան «ընկերները», Կիսելյովի ղեկավարությամբ, ամեն ամիս հանդիպում են և զրուցում ամենատարբեր թեմաների, այդ թվում, ինչն ամենակարևորն է, ՀՀ-ՌԴ հարաբերությունների, երկու երկրների արտաքին քաղաքականության շուրջ, փոխանակվում գաղափարներով:
Ժամանակ առ ժամանակ Կիսելյովը Հայաստան միայնակ չի ժամանում, այլ իր գործընկերների, այդ թվում՝ ռուսաստանյան առաջատար վերլուծաբանների հետ, ովքեր գրիբոյեդովականների հետ հանդիպումները հարստացնում են ռուսական քաղաքականության վերաբերյալ նոր վերլուծություններով, նոր խորհուրդներով: Կիսելյովը, մեր տեղեկությունների համաձայն, «Գրիբոյեդով»-ից դուրս, ունենում է երկկողմ այլ հանդիպումներ ևս: Մեր աղբյուրների փոխանցմամբ՝ ուկրաինական իրադարձությունների թեժ փուլում, երբ նա, ըստ էության, ժամանակ չպետք է ունենար, եղել է Երևանում. նրա վերջին այցելության ժամանակ՝ մայիսի 21-22-ը, նա ունեցել է ոչ միայն ավանդական հանդիպում գրիբոյեդովականների հետ «Երևան պլազա»-ում գտնող «Պանորամա»՝ նախկինում Academia Del Gusto ռեստորանում, այլև այցելել է ՀՀ-ում ՌԴ դեսպանատուն, ապա ունեցել այլ երկկողմ հանդիպումներ ևս: Իսկ թե ինչ հարցեր են քննարկվում փակ հանդիպումների ժամանակ պարզելը բարդ է, թեև իրենք՝ գրիբոյեդովականները, նշում են, որ քննարկումները հետաքրքիր են անցնում կոնյակի կամ գինու, ընթրիքի սեղանի շուրջ, անմիջական մթնոլորտում, որը չէր կարող կայանալ որպես այդպիսին լրատվամիջոցների ներկայության պայմաններում: Սակայն այս հանդիպումները մտահոգիչ չէին լինի, եթե դրանք նախաձեռնված չլինեին Դմիտրի Կիսելյովի կողմից, որը հայտնի է ոչ որպես անաչառ հեռուստամեկնաբան, այլ պուտինյան պրոպագանդիստ, ում կազմակերպած քննարկումները դժվար չէ կռահել՝ ինչ բովանդակություն կարող են ունենալ:
