«Քայքայիչ պաշտամունքներից տուժածների օգնության և վերականգնողական կենտրոնի» ղեկավար Ալեքսանդր Ամարյանի խոսքով` վերջին շրջանում մի շարք երևույթներ տեղի ունեցան, որոնցում ակնհայտ է աղանդավորական տարբեր խմբերի ներկայությունը:
Կոմիտաս վարդապետ Հովնանյանին նյութական վնաս հասցնելը ֆեյսբուքյան էջում ակտիվ քննարկումների առիթ դարձավ: Մարդիկ դրանից օգտվելով՝ սկսեցին ակտիվորեն քննադատել Հայ առաքելական եկեղեցուն, սկսեցին հաշվել Կոմիտաս վարդապետի գումարները: Ամարյանը սա համարում է աղանդավորական գործունեություն: Վահրամ սարկավագին միասեռականության մեջ մեղադրելու հարցում նույնպես աղանդավորներն անմասն չեն: Ամարյանը նշում է` ցանկացած մարդ կարող է նման բան անել, ցանկացածի անվամբ կարելի է էջ բացել և նրան բոլոր մեղքերը վերագրել, և շատերն էլ, փորձելով սենսացիա գտնել դրանում, այն տարածում են:
Նույն ձեռագիրն է նաև Հունան Համբարյանին բռնաբարության մեջ մեղադրելու փորձը: Թեպետ երիտասարդը կարողացավ ոստիկանության միջոցով ապացուցել, որ ինքը նման փորձ չի կատարել, սակայն հեռարձակված մեկ հաղորդումը շատ ավելի մեծ լսարանի հակառակը համոզեց, պիտակավորումն արդեն արված է: Նույն Համբարյանին նաև «Կյանքի խոսք» աղանդի հետ կապեցին, թեև որևէ առնչություն նա չուներ:
Ամարյանի խոսքով` եթե կրոնական կառույցը հասարակական անվտանգության համար սպառնալիք է, ապա պետք է նրա գործունեությունը սահմանափակել: Նա բերեց Ավետարանչական եկեղեցու կողմից Հայաստան բերված մանկական սննդի օրինակը. այդ սննդի մեջ ՍՊԱԾ-ը բոտուլիզմ և ստաֆիլոկոկ է հայտնաբերել, ուստի դրա վերջին` 12.5 տոննա քանակը թույլ չեն տվել Հայաստան ներմուծել: «Երեխաներին մենք դեբիլացնում ենք, սննդաեղեռն է սա, ամեն սնունդ թողնում ենք` տարածվի»,- ասաց նա:
Ասուլիսի մյուս բանախոսը` վերապատվելի Արմեն Միքայելյանը, ժամանակին Ավետարանչական եկեղեցու ներսում ինքնամաքրման գործընթաց է փորձել սկսել, ինչը չի կարողացել, հետո, երբ եղած խախտումները հրապարակայնացվել են, նրան կարգալույծ են արել, նրա «թիմակիցները» հեռացվել են աշխատանքից: 500 հավատացյալի իրավունք ոտնահարվեց, փաստացի` Արագածոտնի մարզի իրենց կառույցը փակվեց: Միքայելյանը դիմում է գրել ԱԱԽ, պատժամիջոցներ են կիրառվել, պարտադրվել է կանոնադրությունը համապատասխանեցնել օրենսդրությանը:
Միքայելյանը նշում է` ձեռնադրությունը մարդու կողմից չի լինում, եկեղեցու կողմից է լինում, ինքն իրեն շարունակում է համարել եկեղեցու հոգևոր սպասավոր: Ավետարանչականները, ըստ Միքայելյանի, պետություն են պետության մեջ: Հայաստանում և Ղարաբաղում նրանք ունեն 48 գրասենյակ, 40 աղոթատեղի, իսկ Ավետարականն ընդհանրապես աշխատողներ, սպասավորներ չունի: «Եկեղեցին պետք է մաքրվի, ծառայի որպես աղոթատեղի` ըստ Աստվածաշնչի, բիզնես չարվի, մարդու իրավունքները չոտնահարվեն, այն մարդիկ, ովքեր շահով են առաջնորդվում, պետք է տեղ չունենան այնտեղ»,- ասաց նա:
