Բարաք Օբաման Լեհաստանից Բրյուսել է ժամանել, որտեղ հանդիպել է Ուկրաինայի նորընտիր նախագահ Պյոտր Պորոշենկոյի հետ: Նրանց զրույցի ժամանակ Սպիտակ տան ղեկավարը կրկին Ուկրաինային աջակցություն է հայտնել և նույնիսկ առաջարկել է, որպեսզի Վաշինգտոնը մարզի ուկրաինացի զինվորականներին և ոստիկանության աշխատակիցներին՝ հաշվի առնելով երկրի արևելքում իրադրության վատթարացումը, գրում է russian.rt.com-ը:
Ընդ որում, Օբաման օգնություն է առաջարկել ոչ միայն Ուկրաինային: Նա հայտարարել է, որ ԱՄՆ-ն աջակցում է Եվրոպայում ՆԱՏՕ-ի բոլոր երկրներին, այդ թվում նաև Լեհաստանին, Լատվիային և Լիտվային: Նրա խոսքերով՝ Վաշինգտոնի ռազմական ներկայությունը Մերձբալթիկայում և Սև ծովում ցույց է տալիս, որ այն աջակցում է այդ երկրներին: Օբաման խոսել է նաև ՆԱՏՕ-ին չանդամակցող երկրին աջակցելու մասին, ինչպիսիք են Ուկրաինան, Վրաստանն ու Մոլդովան:
Ծրագրի համաձայն՝ ԱՄՆ-ի նախագահը պետք է երեք օրվա ընթացքում եվրոպական երեք երկրներ այցելի: Սակայն, հավանաբար, այդ գրաֆիկն Օբամայի համար շատ ծանր է եղել, քանի որ Լեհաստանի նախագահի ելույթի ժամանակ նա քնել է: Դա կարելի է բացատրել նաև ժամային գոտիների փոփոխությամբ: Սակայն պարզ չէ, թե ինչպես հնարավոր կլիներ արդարացնել Լեհաստանի նախագահի նման վարքը Օբամայի ելույթի ժամանակ:
«Մեծ յոթնյակի» գագաթաժողովը, որը հունիսի 4-5 անցկացվում է Բրյուսելում, ի սկզբանե պետք է որպես «Մեծ ութնյակի» գագաթաժողով անցկացվեր Սոչիում: Սակայն այն չեղյալ է հայտարարվել, և ձևաչափը փոփոխվել է, քանի որ Ռուսաստանին գագաթաժողովին մասնակցել թույլ չեն տվել:
