ՆԱՏՕ-ի գլխավոր քարտուղար Անդերս Ֆոգ Ռասմուսենը չի պատասխանել Հյուսիսատլանտյան դաշինքի կազմում Վրաստանի ընդգրկվելու հնարավոր ժամկետների մասին հարցին՝ հայտնում է ITAR-TASS-ը:
«Ես չեմ կարող պատասխանել այդ հարցին: Մենք այսօր ոչ մի կոնկրետ գրաֆիկ չենք քննարկել»,- ասել է նա Վրաստան-ՆԱՏՕ Հանձնաժողովի պաշտպանության նախարարների մակարդակով նիստի ամփոփմանը՝ պատասխանելով վրացի լրագրողի հարցին, թե Թբիլիսին երբ կդառնա ՆԱՏՕ-ի անդամ:
Ռասմուսենի խոսքով՝ Վրաստանի անդամակցության կոնկրետ ժամկետների մասին խոսելու համար «դեռ մի քիչ վաղ է», նույնը վերաբերում է նաև երկրին դաշինքի անդամակցության համար Գործողությունների ծրագրի տրամադրմանը:
Այդ ճանապարհին Վրաստանի ձեռք բերած առաջընթացը պետք է հունիսի վերջին գնահատեն ՆԱՏՕ-ի անդամ երկրների ԱԳՆ ղեկավարները, իսկ հենց «բաց դռների» քաղաքականության վերաբերյալ որոշումը պետք է ընդունեն երկրների և կառավարությունների ղեկավարները, որոնք սեպտեմբերին կհանդիպեն Ուելսում հերթական գագաթնաժողովի ժամանակ՝ ասել է Ռասմուսենը:
Նա վստահեցրել է, որ ՆԱՏՕ-ին անդամակցության համար պահանջվող բարեփոխումների հարցում Վրաստանի առաջընթացը հանդիպման մասնակիցներն այս կամ այն կերպ անպայման կգնահատեն:
