«Հայկական ժամանակ» թերթը գրում է. «ԱԺ ՀՀԿ-ական պատգամավոր Աշոտ Արսենյանը նախորդ տարի 641 միլիոն դրամով (մոտ 1,5 միլիոն դոլար) վաճառել է իրեն պատկանող հասարակական նշանակության շինություն և վաճառքից ստացված եկամուտով բաժնեթղթեր ձեռք բերել։ Պատգամավորը միաժամանակ 15,3 միլիոն դրամով գնել է «Հոնդա ակորդ» մակնիշի ավտոմեքենա։ Աշոտ Արսենյանի հարկային տարվա փոխառությունները կազմել են 3,5 միլիարդ դրամ և 5,7 միլիոն դոլար։ Հանրապետական պատգամավորի դրամական միջոցները կազմել են 50 միլիոն դրամ, 200 հազար դոլար և 100 հազար եվրո։ «Ջերմուկ գրուպի» սեփականատիրոջ 2013 թ. տարեկան եկամուտները կազմել են 6 միլիարդ 818 միլիոն 140 հազար դրամ, 1,1 միլիոն դոլար և 33 հազար եվրո։ Այս գումարից ընդամենը 2,9 միլիոն դրամն է պատգամավորի աշխատավարձը, մնացածը՝ շահաբաժին և փոխառություններ են։
Պատգամավորի կինը՝ Գայանե Մկրտչյանը, հայտարարագրել է 400 միլիոն դրամ և 300 հազար դոլար դրամական միջոցներ։ Հայտարարագրի համաձայն՝ նրա տարեկան եկամուտները կազմել են 122,5 միլիոն դրամ՝ շահաբաժնից։ Պատգամավորի որդին՝ Վահագն Արսենյանը, հարկային տարվա ընթացքում 110,1 միլիոն դրամի փոխառություններ է հանձնել։ Նրա տարեկան եկամուտները կազմել են 102,8 միլիոն դրամ, որից 2,8 միլիոնը աշխատավարձն է, մնացածը՝ նվիրատվություն։ 2012 թ. ԿԸՀ-ին ներկայացրած հայտարարագրի համաձայն՝ «Ջերմուկ գրուպի» սեփականատեր Աշոտ Արսենյանն ունի 4 շենք և շինություն՝ 3324 քմ ընդհանուր մակերեսով, ինչպես նաև 2 հողամաս Երևանում և Վայոց ձորում»։
Մանրամասները՝ թերթի այսօրվա համարում:
