Երևանի քաղաքապետարանի նախաձեռնությամբ երեխաների իրավունքների պաշտպանության միջազգային օրվան նվիրված միջոցառումների շրջանակում կազմակերպվել է մարզահամերգային տոնահանդես, որին մասնակցել են մայրաքաղաքի մանկապարտեզների բարձր խմբերի երեխաները:
Մարզական առաջնությանը մանկապարտեզների սաները մրցել են 4 մրցաձևերում: Յուրաքանչյուր վարչական շրջանից մրցույթին մասնակցել է մեկական թիմ՝ 10 անդամով:Դրանք այն թիմերն են, որոնք վարչական շրջաններում նախապես անցկացված մրցման ժամանակ գրանցել էին լավագույն արդյունքը:
Երևանի քաղաքապետարանի աշխատակազմի սպորտի և երիտասարդության հարցերի բաժնի պետ Յուրի Մամիկոնյանը նշել է, որ միջոցառման գլխավոր նպատակը երեխաների շրջանում փոքր տարիքից առողջ ապրելակերպը քարոզելն է: Նա նաև տեղեկացրել է, որ ամռան ընթացքում մայրաքաղաքում կանցկացվեն բազմաթիվ այլ հետաքրքր մարզական միջոցառումներ:
Անկախ արդյուքններից հաղթողներ և պարտվողներ չեն եղել: Մասնակից բոլոր մանուկներն ու մանկապարտեզներն արժանացել են խրախուսական նվերների:
Միջոցառումը եզրափակվել է մանկապարտեզների սաների համերգային ուրախ ծրագրով:
