Ատլանտյան օվկիանոսում սկսվել է փոթորիկների նոր սեզոն: Օվկիանոսային և մթնոլորտային հետազոտությունների ԱՄՆ ազգային վարչության մասնագետների կանխատեսումներով՝ այն կլինի ոչ շատ ակտիվ:
Ինչպես սպասվում է՝ այս տարի Ատլանտյան օվկիանոսում կձևավորվի 8-13 արևադարձային փոթորիկ: Դրանցից 3-6-ը կվերածվեն մրրիկների, իսկ 1-2-ը կհասնեն Սաֆիր Սիմփսոնի 5 բալանոց սանդղակի վտանգավորության երրորդ կատեգորիային: Այս մասին հայտնում է ITAR-TASS-ը:
Այդ կանխատեսումը մասամբ բացատրվում է նրանով, որ այս տարի մեծ է Էլ-Նինո երևույթի առաջացման հավանականությունը, որը բնութագրվում է Խաղաղ օվկիանոսի արևադարձային գոտու մակերեսային ջրաշերտերի ջերմաստիճանի անոմալ բարձրացմամբ:
Էլ-Նինոն մասնավորապես ազդում է քամիների ուղղությունների վրա, ինչի արդյունքում նվազում է Ատլանտյան օվկիանոսի վրա մրրիկների ձևավորման հավանականությունը: Այդ օդերևութաբանական երևույթը, որպես կանոն, հանգեցնում է երաշտի՝ Հարավարևելյան Ասիայում, և տեղատարափ անձրևների՝ Հարավային Ամերիկայում:
Փոթորիկների սեզոնն ավանդաբար շարունակվում է մինչև նոյեմբերի 30-ը:
Անցած սեզոնը բավականին հանգիստ է եղել, ձևավորվել է 13 փոթորիկ:
