Թուրքական Haberler.com կայքի փոխանցմամբ`այսօր տեղական ժամանակով ժամը 09.05-ին որոշ ժամկետով (սովորաբար 1-2 րոպեով) Թուրքիայում կյանքը կանգ է առել. 74 տարի առաջ` 1938 թվականի նոյեմբերի 10-ին` ժամը 09.05-ին, մահացել է Թուրքիայի Հանրապետության հիմնադիր և առաջին նախագահ Մուսթաֆա Քեմալ Աթաթուրքը:
Այսօր Թուրքիայում նշված ժամին հնչել են շչակները, իջեցվել են դրոշները, Ստամբուլի կամրջի վրա անգամ որոշ ժամանակով կանգնեցվել է երթևեկությունը, մի շարք վարորդներ դուրս են եկել իրենց մեքենաներից և հարգանքի տուրք մատուցել Աթաթուրքին:
Աթաթուրքի մահվան օրվա կապակցությամբ Թուրքիայի ներկայիս նախագահ Աբդուլլահ Գյուլը, խորհրդարանի նախագահ Ջեմիլ Չիչեքը, Աթաթուրքի հիմնած «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուն, փոխվարչապետներ Բյուլենթ Արընչը, Բեքիր Բոզդաղը և այլք այցելել են Անկարայում գտնվող Աթաթուրքի դամբարան և հարգել նրա հիշատակը:
Թուրքական լրատվամիջոցն ուշադրություն է հրավիրում այն փաստի վրա, որ Աթաթուրքի դամբարան այցելած և նրա հիշատակը հարգած բարձրաստիճան պաշտոնյաների թվում բացակայում է վարչապետ Ռեջեփ Էրդողանը, ով ներկայիս դրությամբ գտնվում է արտասահմանում (Ինդոնեզիա, Բրունեյ): Հոկտեմբերի 29-ին նշվել էր Թուրքիայի Հանրապետության հիմնադրման 89-ամյակը:
Հիշեցնենք, որ վերջին տարիներին Էրդողանը բազում քայլեր է կատարել` քեմալիզմի հիմքերն ու ավանդույթները խարխլելու համար: Ի դեպ, օրեր առաջ CNN TÜRK հեռուստաալիքի «Ի՞նչ է լինում» հաղորդման ժամանակ դասախոս Մուսթաֆա Ալթըօքլարը հայտարարել է, որ 1881 թվականին ծնված Մուսթաֆա Քեմալ Աթաթուրքը չի մահացել իր բնական պահով:
Դրանով նա հերքել է այն, որ Աթաթուրքը մահացել է լյարդի ցիռոզից, ինչպես ընդունված է համարել: Ալթըօքլարն ընդգծել է, որ Աթաթուրքին սպանել են Թուրքիայի լիակատար անկախությունն ու վերելքը չցանկացող արևմտամետ ուժերը:
