Թուրքական Zaman թերթի փոխանցմամբ, այսօր վարչապետ Էրդողանը ելույթ է ունեցել Մոսկվայի միջազգային հարաբերությունների պետական ինստիտուտում, ուր նրան շնորհվել է պատվավոր դոկտորի կոչում.
«Ուղիղ 90 տարի առաջ այս օրը` 1921 թվականի մարտի 16-ին, մենք «բարեկամության և եղբայրության պայմանագիր» կնքեցինք տվյալ ժամանակ ՌՍՖՍՀ-ի հետ, որը ստացավ «Մոսկվայի պայմանագիր» անվանումը: Արդեն 90 տարի է, ինչ երկու հարևան երկրները պահպանում են ջերմ հարաբերություններ և համագործակցում են միմյանց հետ: Այդ ժամանակահատվածում բավականին աճ է արձանագրել քաղաքական, տնտեսական, ռազմական և մշակութային ոլորտներում մեր համագործակցությունը: Անգամ դժվարին իրավիճակներում երկու երկրները երես չեն թեքել միմյանցից:
Այսօր երկու երկրներին սպառնում է ահաբեկչության վտանգը: Մենք դատապարտում ենք անցյալ տարվա մարտին և այս տարվա փետրվարին Մոսկվայում իրականացված ահաբեկչական գործողությունները: Թուրքիան նույնպես հայտնվել է ահաբեկիչների թիրախում, որոնց համար կարևոր չէ, թե ում են սպանում. քաղաքացիական անձ, զինվորական, երեխա, կին, տարեց անձ:
Այսօր ահաբեկչությունը գործածվում է երկրին վնաս պատճառելու, նրա տնտեսական կայունությունը խաթարելու, վախի մթնոլորտ ստեղծելու և տվյալ երկրի քաղաքականությունն ուղղորդելու համար»:
Հիշեցնենք, որ Թուրքիայի ահաբեկիչների անվան տակ Էրդողանը նկատի ունի քուրդ առաջնորդ Աբդուլլահ Օջալանի հիմնադրած և Թուրքիայում արգելված Քրդստանի աշխատավորական կուսակցության (PKK) զինյալներին:
Էրդողանի մոսկովյան այցից առաջ քրդական կողմը հայտարարեց, թե Մոսկվայում Էրդողանը ճնշում է գործադրելու Ռուսաստանի վրա, որպեսզի վերջինս փոխի իր «քրդական քաղաքականությունը»:
Չպետք է մոռանալ, որ հոկտեմբերի սկզբին թուրքական հետախուզության (MIT) հրապարակած հաշվետվության մեջ նշված էր, որ քուրդ զինյալներից խլված զենքի մեծամասնությունը մատակարարվել է Ռուսաստանից: Մասնավորապես, խլված ինքնաձիգների 70 տոկոսը եղել են «Կալաշնիկով» տիպի ռուսական ինքնաձիգեր, իսկ խլված հակատանկային ականների նվազագույնը 85 տոկոսը PKK-ին մատակարարել են զենքի առևտրով զբաղվող ռուս վաճառականները: Այս մասին Թուրքիային տեղյակ են պահել ԱՄՆ հատուկ ծառայությունները: Դրանով ԱՄՆ-ը ձգտում է միմյանց բախեցնել Թուրքիային ու Ռուսաստանին և որոշակիորեն սառեցնել նրանց միջև առկա ջերմ հարաբերությունները:
