Վերջերս ֆինանսների նախարար Վաչե Գաբրիելյանը տնտեսության ստվերայնության թիվ հնչեցրեց՝ 35 %, իսկ փոխնախարար Պավել Սաֆարյանը մեզ հետ զրույցում հայտնեց, որ հաջորդ տարվա բյուջեի եկամուտների միայն 0.3 %-ն է ստվերի հաշվին ապահովվելու: Մեկնաբանելով այս հայտարարությունները՝ ՊԵԿ-ի փոխնախագահ Արմեն Ալավերդյանն «Առաջին լրատվական»-ի հետ զրույցում նկատեց. «Պարոն Գաբրիելյանն ու պարոն Սաֆարյանը դժվար թե սխալվեին: Ես կարծում եմ, որ այդ կոնտեքստով նրանք այնքան բարձր պրոֆեսիոնալներ են, որ չէին կարող սխալվել: Ուղղակի ես ասում եմ, որ մենք երբ ծրագրում ենք շուրջ 1 տրլն բյուջետային եկամուտ, այդ գումարը ինքնահոսի չի գալու բյուջե: Դրա համար հարկավոր է տքնաջան աշխատանք, որի համար պետք են ժամանակակից գործիքներ, որ այդ հսկողությունն ամեն օր իրականացվի: Բոլորին պետք է հիշեցնել, որ հաշվետվությունները տան ժամանակին և ճիշտ: Եթե բիզնեսը զգաց, որ իր նկատմամբ հսկողությունը թուլացել է…»:
Ի պատասխան մեր հարցին՝ այնուամենայնիվ հարկային պոտենցիալը որքա՞ն է, Ա.Ալավերդյանը խորհուրդ տվեց չհավատալ ոչ մեկին, որ կնշի որևէ թիվ:
«Թող մի համարձակ տնտեսագետ կանգնի ու ասի՝ այսքան է: Չհավատաք իրեն: Այդ պոտենցիալը կարող է փորձագիտական գնահատականի ենթարկվել: Մեկը կասի 100 մլրդ, մեկը կասի 200 մլրդ, մեկն՝ ավելին: Այդ բոլորին կարելի է լսել, եթե իմանաս, թե ինչի հիման վրա է գնահատվել: ՀԲ գնահատականը՝ 240 մլրդ, գուցե ավելի շատ է, գուցե՝ քիչ: Այդ թիվը դեռ բավական չի, որ ձեզ որևէ բան հուշի: Մեկ բան ակնհայտ է՝ կան ոլորտներ, որտեղ կան ստվերային շրջանառություններ, և մենք դրանց հիմնական պատճառները հնչեցրինք առանց վախենալու»,- ասաց Ա. Ալավերդյանը:
ՊԵԿ-ի փոխնախագահը նկատեց, որ արդեն ստվերի դեմ պայքարի արդյունքներ կան՝ առողջապահության, կրթության, տրանսպորտի, հանքարդյունաբերության ոլորտներում: Ըստ նրա՝ պետք է բոլորը փաստաթղթաշրջանառության ապահովման ուղղությամբ քայլեր անեն, այլապես հաջորդ տարիներին այս ահագնացող երևույթները մնալու են. «Պետք է այնպես անել, որ բիզնեսն աշխատի փաստաթղթով, թափանցիկ: Եթե ֆինանսական հատվածում կարգապահություն կա, հարկեր գանձելն անհամեմատ հեշտ է լինում, այն էլ՝ էլեկտրոնային եղանակով: Եվ մենք գնում ենք դրան»:
