«Բյուջեի քննարկումներն անցան բավական շահագրգիռ մթնոլորտում: Եթե նայում ենք ծրագրային շարունակականության տեսակետից, մի շարք ծրագրեր ընդլայնվել են: Մենք ունենք եկամուտների ավելացում: Ընդհանուր գումարը 1 տրիլիոն 31 միլիարդ դրամի չափով է, որն ավելին է նախորդ տարվա բյուջեից 107 միլիարդ դրամով կամ 13,2 տոկոսով: Այդքան եկամուտների աճ ունենք, և այդքան աճի էական մասը հարկերի և տուրքերի մասով է: Այդ 107 միլիարդից մի էական կտոր այն բանի շնորհիվ է, որ մենք հարկման դաշտ ենք բերում զինծառայողներին և նրանց հավասարեցված անձանց: 31 միլիարդը դրանք են»,- Հանրային հեռուստաընկերության «Հարցազրույց» հաղորդման եթերում ասել է ՀՀ ֆինանսների նախարար Վաչե Գաբրիելյանը:
«Մենք բյուջեում ընդունել ենք սկզբունք, որ որևէ մեկի եկամուտը չպետք է պակասի. դրա համար մենք էական գումարներ ենք հատկացրել»,- հավելել է նախարարը: Նա նշել է, որ սպասարկման տեսակետից ամենամեծ բեռը կրելու է արտաքին պարտքը: Կտրուկ աճ է գրանցվել պաշտպանության ոլորտում՝ 9 միլիարդ դրամ, մնացած ոլորտներում թեև կա աճ, բայց մեծ չէ:
Ընդդիմադիրների փաստարկը, թե կյանքի բարելավում չի լինի նաև եկող տարի, նախարարն արդարացի չի համարում: «Հայաստանի քաղաքացին մի քիչ ավելի լավ կապրի, եթե լինի ընդհանուր տնտեսական աճ»,- ասել է նա: Ընդդիմադիրների պնդմանը, թե բյուջետային աշխատողի աշխատավարձի բարձրացում չի լինելու, բայց լինելու է գնաճ, ուրեմն քաղաքացին վատ է ապրելու, նախարարը պատասխանել է, որ մի քանի երկրներ կան, որտեղ աշխատավարձերն ավտոմատ ինդեքսավորվում են: «Մեզ մոտ բարձրացվել է նվազագույն աշխատվարձը: Ճիշտ է՝ քիչ, բայց ծրագրային բարձրացում է: Պետք է 5 տարում կրկնապատկվի նվազագույն աշխատվարձը: Եկող տարի կբարձրացնեն 10 հազար դրամով, մյուս տարի՝ ևս: Եթե ես հիմա ասեմ, որ 35 հազար դրամով լարելի է ճոխ ապրել, որևէ մեկը չի հավատա, բայց որ ասեմ, որ ավելացումը ոչինչ է, դարձյալ սուտ կլինի»,- ասել է Վաչե Գաբրիելյանը:
Հարցին, թե տնտեսության աճը ում վրա է ազդում, եթե քաղաքացին դժգոհ է՝ ֆինանսների նախարարը պատասխանել է, որ աճ կա, և հենց այդ աճի հաշվին էլ հարկային մուտքերն ավելացվում են: Կաճի արդյունաբերությունը, ծառայությունները և գյուղատնտեսությունը:
Անդրադառնալով գազի և էլեկտրաէներգիայի գնի փոփոխմանը, նախարարն ասել է, որ բյուջեով հաշվարկ չի արվել. «Գնում են բանակցություններ և քանի դեռ չեն ավարտվել, որևէ բան չենք կարող կանխատեսել»:
