Բրիտանացի բիզնեսմեն Նիլ Հեյվուդը, ում թունավորման համար Չինաստանի կառավարությունը մեղադրել էր կուսակցական գործիչ Բո Սիլայի կնոջը, զույգի մասին տեղեկություններ է տվել բրիտանական MI-6 արտաքին հետախուզությանը։ Այս մասին գրում է Wall Street Journal-ը:
Ամսագրի լրագրողները, հիմնվելով բրիտանացի նախկին և ներկա քաղաքական գործիչների, սպանվածի մտերիմների և հարազատների հետ հարցազրույցների վրա, սեփական հետաքննություն են կատարել: Նրանց տվյալներով` մարդը, որի հետ 2009-ին հանդիպել էր Հեյվուդը, MI-6 գաղտնի հետախուզական ծառայության սպա է եղել: 1 տարուց ավել բրիտանացին նրան Բո Սիլայ-Գու Կայլայ զույգի մասին տեղեկություններ է տվել: Հրատարակությունը նշում է, որ Չինաստանում քաղաքական գործիչների անձնական կյանքը համարվում է պետական գաղտնիք, իսկ նրանց մասին տեղեկությունները բարձր են գնահատվում անպարզ քաղաքական համակարգի ներքին գործընթացները հասկանալ փորձող կառավարությունների կողմից:
Հեյվուդը գործնական հարաբերություններ է ունեցել մի քանի բրիտանական ընկերությունների և քաղաքական գործիչների, ներառյալ` Բրիտանիայի Լորդերի պալատի 2 անդամների հետ: Հետաքննությանը ծանոթ մարդկանց ցուցմունքների համաձայն` գործընկերներից մեկը մի անգամ նրան տեսել է MI-6-ի աշխատակիցների հետ:
Հիշեցնենք, որ Նիլ Հեյվուդին 2012-ի սկզբին Չունցինի հյուրանոցներից մեկում գտել էին սպանված: Այն ժամանակ հայտնում էին, որ նա մահացել է ալկոհոլային թունավորումից:
