Այսօր «Զվարթնոց» ավիաօդերևութաբանական կենտրոն ՓԲ ընկերության փոխտնօրեն, տնօրենի ժամանակավոր պաշտոնակատար Պավել Մանուկյանը հայտարարեց, որ եթե ժամանակին ավիաընկերությունները վճարումներ չկատարեն, կդադարեցնի պայմանագիրը՝ ոչ մի չվերթ չի սպասարկվի:
«Արմավիա» ավիաընկերության մամլո խոսնակ Նանա Ավետիսովան նշեց, որ իրենց անհրաժեշտ չէ «Զվարթնոց» ավիաօդերևութաբանական կենտրոնի ծառայությունը: Նանա Ավետիսովայի պնդմամբ՝ «Արմավիա»-ն նույն ծառայությունը կարող է ստանալ «Հայաէրոնավիգացիա» ՓԲԸ-ից ավելի մատչելի գնով:
«Ողջ աշխարհում յուրաքանչյուր քաղաքում, որտեղ մենք գնում ենք, այնպիսի պրակտիկա է, որ ավիաուղղություններն աշխատում են միայն աէրոնավիգացիայի հետ: Մենք այդ նույն մետեոն կարող ենք ստանալ աէրոնավիգացիայից: Եթե «Զվարթնոց» ավիաօդերևութաբանական կենտրոնը դադարեցնի համագործակցությունը, մենք ուրախ կլինենք. նրանք ավիաընկերությունների համար ավելորդ ստրուկտուրա են»,- մեկնաբանեց Նանա Ավետիսովան:
Անդրադառնալով «Արմավիա» ավիաընկերության պարտքերին՝ ասաց, որ պարտքերի հարցով արդեն իրավաբաններն ու ղեկավարությունը պետք է զբաղվեն, երբ ինչ-որ հայց ներկայացվի:
Մեկնաբանելով Պավել Մանուկյանի դիմումը` ուղղված ՀՀ նախագահին, ով, Մանուկյանի խոսքով, հակազգային բանդայի նկատմամբ միջոցներ պետք է ձեռք առնի, «Արմավիա» ընկերության խոսնակն ասաց` եթե իրենց վերջին քայլը դա է, ուրեմն դա իրենց գործն է, իրենց իրավունքն է:
Նանա Ավետիսովան նաև արձագանքեց Պավել Մանուկյանի խոսքին, թե «Արմավիա»-ին որոշակի զեղչեր են արել: Ընկերության խոսնակն ասաց, որ զեղչերի վերաբերյալ կնքված պայմանագրից հետո «Արմավիա»-ն դիմել է, որ վերանայեն գները՝ 60 դոլար ոչ թե ամեն թռիչքի համար, այլ օրավճարով:
Նանա Ավետիսովայի վստահեցմամբ` դեռևս այդ հարցով «Զվարթնոց» ավիաօդերևութաբանական կենտրոնից պատասխան չի եղել: «Ամեն օր մոտավորապես 10 թռիչք իրականացվում է, ամառային սեզոնին` առավել շատ, դրա համար մենք իրենց դիմեցինք, որ գումարը վերանայեն»,- եզրափակեց իր խոսքը Նանա Ավետիսովան: Ըստ նրա՝ բոլոր ծառայությունների վճարները որոշակի տոկոսով անդրադառնում են ավիատոմսերի գների վրա, որից տուժում է ուղևորը:
Հիշեցնենք, որ «Զվարթնոց» ավիաօդերևութաբանական կենտրոն ՓԲ ընկերության փոխտնօրեն, տնօրենի ժամանակավոր պաշտոնակատար Պավել Մանուկյանն այսօր լրագրողների հետ հանդիպման ժամանակ նշել էր, որ «Արմավիա»-ի հետ հարաբերությունների կարգավորման բազմաթիվ փորձերն անօգուտ են, «Արմավիան» հասել է այն աստիճանի, որ ոչ մի հեռախոսազանգի չի պատասխանում.
««Արմավիա» ընկերությունը սահմանեց մի նոր անբարոյական ռեկորդ, որը գերազանցեց իր անցյալ տարվա ռեկորդը. անցյալ տարի պարտքը 48 միլիոն դրամ էր, իսկ այսօր պարտքը կազմում է 93 միլիոն 780 հազար դրամ»,- ասել էր նա` հավելելով, որ «Զվարթնոց» ավիաօդերևութաբանական կենտրոն ՓԲ ընկերությունն իր առջև ունի պետական պարտավորվածություններ, ինչպես նաև տարբեր կազմակերպությունների հետ որոշ պարտավորություններ, նաև օդանավակայանին են պարտք, որն արդեն նամակով դիմել է՝ եթե ժամանակին վճարումներ չկատարեն, կդադարեցնի պայմանագիրը, իսկ դա նշանակում է, որ ոչ մի չվերթ չի լինելու:
