Կատարի մայրաքաղաք Դոհայում այսօր բացվում է սիրիական ընդդիմության հերթական «միավորման ֆորումը»: Ինչպես նախորդ նման հանդիպումները, այս ֆորումը ևս անցկացվում է Ստամբուլում տեղակայված Սիրիայի ազգային խորհրդի հովանու ներքո: Սակայն սպասվում է, որ ԱՄՆ պետքարտուղար Հիլարի Քլինթոնի կողմից այդ խորհրդի հասցեին հնչեցված քննադատություններից հետո, Դոհայում կհայտարարվի «սիրիական հեղափոխության» նոր ղեկավար մարմինների ստեղծման մասին:
Դոհայում «վտարանդի կառավարության» ձևավորման հնարավորության մասին ազդանշանը շաբաթ օրը ստացվել է Ամանից: Այնտեղ անցկացվել էր նախապատրաստական խորհրդակցական կոնֆերանս, որը կազմակերպել էր Սիրիայի խորհրդարանի նախկին պատգամավոր Ռիադ Սեյֆը:
Այդ 66-ամյա այլախոհ, Սիրիայի ազգային խորհրդի ղեկավարության անդամը, վայելում է Վաշինգտոնի վստահությունը և արևմտյան աղբյուրների տվյալներով՝ կարող է դառնալ ընդդիմության նոր ղեկավարը: Սեյֆը մտադիր է մեկ տանիքի տակ հավաքել ներսում և արտերկրում գտնվող ընդդիմության ներկայացուցիչներին: Նրա ջանքերին ակտիվորեն աջակցում է Սիրիայի նախկին վարչապետ Ռիադ Հիջաբը, որն օգոստոսին Հորդանան էր փախել:
Նախկի վարչապետի պաշտոնական ներկայացուցիչ Մուհամմեդ Ալ-Օտրին «Աշ-Շարկ ալ-Աուսատի» հետ հարցազրուցում ասել էր, որ Դոհայում կայանալիք ֆորումի արդյունքներով կհայտարարվի 50 հոգուց կազմված «Գերագույն ղեկավար մարմնի» ստեղծման մասին (15-ը՝ Սիրիայի ազգային խորհրդից):
Նախնական տվյալներով՝ Դոհայում կհավաքվեն 420 պատվիրակներ: Ներքին ընդդիմության մի շարք ազդեցիկ խմբակցություններ, ինչպիսիք են՝ ազգային համակարգման հանձնաժողովը, «Դեմոկրատական դատարանը», «Բինա ադ-Դաուլյա» շարժումը, հայտարարել են մասնակցությունից հրաժարվելու մասին:
