Հնարավոր է՝ Իտալիան խաղաղապահ կոնտինգենտ ուղարկի Ուկրաինա, եթե դրա անհրաժեշտությունը լինի: Համենայնդեպս՝ պետք է պատրաստ լինել դեպքերի նման զարգացման: Այս մասին La Repubblica պարբերականին հայտնել է Իտալիայի պատշպանության նախարար Ռոբերտա Պինոտին:
«Իրավիճակը շատ տագնապալի է, և կառավարությունն այն օբյեկտիվ է գնահատում: Չեմ կարծում, որ մենք (Եվրոպան- խմբ.) եվրոպական պատերազմի նախօրեին ենք: Բայց սա չի նշանակում, որ մենք պետք է ձեռքներս ծալած նստենք: Անխոս, մենք միայնակ չենք գործի, այլ ՄԱԿ-ի, ՆԱՏՕ-ի և ԵՄ-ի միջոցով»,- ասել է նախարարը:
«Մենք՝ իտալացիներս, Գերմանիայի հետ մինչև վերջերս աշխատում էինք Ռուսաստանի նկատմամբ պատժամիջոցներից խուսափելու և դժվար կառավարելի հակամարտությանը վերջ տալուն օգնելու համար: Մենք պատրաստ ենք ավելին անել,- ասել է Պինոտին:- Դեռ վաղ է խաղաղապահ ուժերի մասին խոսել. ոչ ոք մեզ նման խնդրանքով չի դիմել, բայց եթե դա օգնի, մենք պետք է պատրաստ լինենք նաև դրան: Առայժմ մեր քաղաքական և դիվանագիտական ջանքերի նպատակն է ժնևյան պայմանավորվածությունների ոգուն վերադարձը»:
