Հայաստանի հետ մեր հարաբերությունները կառուցելու ենք հենվելով բոլոր այն դրական արդյունքների վրա, որ կուտակել ենք 3.5 տարի տևած բանակցությունների ընթացքում: «Ազատություն» ռադիոկայանին՝ Պրահայի կենտրոնակայանում տված բացառիկ հարցազրույցում, այս մասին ասել է ԵՄ ընդլայնման հարցերով հանձնակատար Շտեֆան Ֆյուլեն՝ պատասխանելով «Ազատություն» ռադիոկայանի հայկական ծառայության հարցին, թե արդյոք Եվրամիությունը պատրաստո՞ւմ է նոր համաձայնություն, որը թույլ կտա Հայաստանին պահպանել սերտ Հարաբերությունները Բրյուսելի հետ:
Ֆյուլեն նշել է.- «Արևելյան գործընկերության քաղաքականությունը մեր գործընկերներին չի ստիպում ընտրություն կատարել Մոսկվայի և Բրյուսելի միջև։ Կուզեի նաև նշել՝ եթե մեր գործընկերներից մեկը նման ընտրություն է կատարում, մենք մշտապես դրան հարգանքով են վերաբերում։ Ինչ վերաբերում է Հայաստանին, մենք հստակ ասել ենք, որ մենք մեր ապագա գործընկերությունը կառուցելու ենք հենվելով բոլոր այն դրական արդյունքների վրա, որ կուտակել ենք 3.5 տարի տևած բանակցությունների ընթացքում»։ Ֆյուլեն, ում պաշտոնավարումը կավարտվի այս հոկտեմբերին, խոսել է նաև Արևելյան գործընկերության ճակատագրի, Ուկրաինայում ռուսական քաղաքականության և ԵՄ հետագա քայլերի շուրջ:
