«Հրապարակ» օրաթերթը վերջերս տեղեկություն էր հրապարակել այն մասին, որ Հոկտեմբերի 27-ի գործով առանցքային վկա, Հ1-ի նախկին թղթակից, ԱՄՆ-ում առեղծվածային մահով մահացած Տիգրան Նազարյանը մահվանից առաջ տեսաձայնագրություն է ուղարկել Հայաստան: Հրապարակման համաձայն՝ Նազարյանը սենսացիոն բացահայտումներ է արել Հոկտեմբերի 27-ի կապակցությամբ՝ մասնավորապես գործին առնչություն ունենալու մեջ մեղադրել Հայաստանի երկրորդ և երրորդ նախագահներին, երկրորդ նախագահի աշխատակազմի ղեկավար Ալեքսան Հարությունյանին:
Տիգրան Նազարյանը վերջին հարցազրույցը տվել է Լոս Անջելեսի AMGA հայկական հեռուստաալիքի «Վարագույր» ծրագրի տնօրեն, մեկնաբան Ռուդիկ Հովսեփյանին, որի ժամանակ գործի կապակցությամբ կրկին հետաքրքիր հայտարարություններ է արել:
«Առաջին լրատվական»-ը զրուցեց Ռ. Հովսեփյանի հետ՝ պարզելու համար, թե պատկերացում ունի՞, թե այդ նոր տեսաձայնագրությունն ինչ բովանդակություն կարող է ունենալ:
Ի պատասխան մեր հարցադրման՝ Հովսեփյանն ասաց, թե չի կարծում, որ Տիգրան Նազարյանը որևէ նոր բան կարող է ասած լինել: Նրա դիտարկմամբ՝ եթե լիներ նման ձայնագրություն, ապա այն մարդը, ում իբր դա ուղարկվելէ, վաղուց ջրի երես կհաներ:
Մեկ ուշագրավ հանգամանք պարզեցինք Ռուդիկ Հովսեփյանից: Մեր զրուցակիցը կասկածի տակ առավ պաշտոնական այն վարկածը, թե Տիգրան Նազարյանը մահացել է քաղցկեղից. «Այդ տեսաձայնագրությունը, իմ կարծիքով, հերթական տարածված բլեֆ է: Տիգրանը երբեք չէր սպասում մահվան: Ես իրեն տեսել եմ մահից կարճ ժամանակ առաջ, միանգամայն առողջ էր, ինձ էլ առողջություն էր մաղթում: Շնորհակալություն հայտնեց, որ իրեն այդ վիճակից հանել եմ: Ես էլ ասացի՝ որ օրը նորից ասելու բան ունենաս, արի, ասաց՝ եղավ: Շատ լավ էր. եթե Տիգրան Նազարյանը քաղցկեղ ունենար, նա այդ ժամանակ քիմիաթերապիա պետք է ընդուներ և այդ բարձր տրամադրությունը չէր ունենա, կասեր՝ հիվանդ է, անբուժելի հիվանդություն ունի: Հետո՝ այստեղ քաղցկեղից մահացող չկա, ամենածանր քաղցկեղից՝ արյան քաղցկեղից, մեկ կամ երկու ամսում մահացող չկա, եթե մահանում են, ուրեմն գոնե 3-4 տարի հիվանդ են եղել, այստեղ երկարացնում են կյանքը:
Գիտեք, ես աշխարհում ոչինչ չեմ բացառում, բայց ես չեմ հավատում: Ես հիմա հիվանդ եմ, ամբողջ քաղաքը գիտի, որ ես քիմիաթերապիա եմ ընդունում, իսկ ո՞նց եղավ, որ իր շրջապատից ոչ մեկը չգիտեր, որ նա քաղցկեղով հիվանդ է»,-ասաց Հովսեփյանը:
Ռուդիկ Հովսեփյանի խոսքով՝ Տիգրան Նազարյանը, մինչ իրեն հարցազրույց տալը փողոցում հանդիպել է իրեն և ընկճված ասել, որ վախենում է փողոց դուրս գալ. «Ես էլ ասացի, որ գա՝ խոսենք, եկավ, ու ինձ հետո շնորհակալություն էր հայտնում, որ դրանից հետո կարողացել է հանգիստ դուրս գալ փողոց, քանի որ նման հարցազրույցից հետո կարծում էր՝ իրեն ոչ ոք ձեռք չի տա:
Նա պարզ տեքստով ասաց, որ Ալիկ Հարությունյանը ամեն ինչից տեղյակ է եղել, այդ օրն էլ գինովցած է եղել: Քոչարյանի մասով նա տեղեկացրեց, որ ևս տեղյակ է եղել: Ասաց՝ Ռուդիկ ջան, Քոչարյանը պետք է հանցագործի հետ խոսի, որին ես եմ ներս բերում, ինձ ներս չեն թողնում, ինչի՞ մասին է խոսում: Տրամաբանորեն պետք է վախենար, որ հանցագործ է, հեչ որ չէ՝ աթոռը կարող է գլխին տար: Պահանջել են, որ նույնիսկ թիկնապահները, Տիգրան Նազարյանը դրսում սպասեն: Այդ սենյակում ոչ ոք չի եղել՝ հասկանում եք, ու ոչ մի վախ Քոչարյանի կողմից:
Չգիտեմ, Տիգրան Նազարյանը Նաղդալյանին շատ չբացահայտեց, ավելի փակում էր, իսկ մնացածի մասին ամեն ինչ էլ պատմեց»:
