Հարավկորեական Samsung ընկերության սմարթֆոնների վաճառքը 2014-ի առաջին եռամսյակում աճել է 28 տոկոսով՝ հասնելով 89 մլն սարքի, սակայն ընկերության մասնաբաժինը համաշխարհային շուկայում 4 տարվա մեջ առաջին անգամ նվազել է: Այս մասին հայտնում է Bloomberg-ը՝ հղում անելով Strategy Analytics վերլուծական ընկերության տվյալներին:
Samsung-ի մասնաբաժինը սմարթֆոնների շուկայում նվազել է՝ հասնելով 31.2 տոկոսի, մինչդեռ անցած տարի ցուցանիշը կազմում էր 32.4 տոկոս: Չնայած դրան՝ ընկերությունը մնում է աշխարհում սմարթֆոնների խոշորագույն արտադրող:
Նրա գլխավոր մրցակից Apple-ի բաժնեմասը 17.5 տոկոսից նվազել է և հասել 15.3 տոկոսի: Ավելի վաղ Apple-ը հայտնել էր, որ հունվար-մարտ ամիսներին վաճառել է 43.7 մլն սմարթֆոն՝ 17 տոկոսով ավելի, քան անցած տարի:
Շուկայի խոշորագույն խաղացողները, չնայած վաճառքի մեծացմանը, գնալով զիջում են դիրքերը չինացի արտադրողներին:
Samsung-ի տվյալներով՝ ընկերությունը եռամսյակում վաճառել է մոտ 13 մլն պլանշետային համակարգիչ: Համեմատության համար նշենք, որ Apple-ը նույն ժամանակահատվածում իրացրել է 16.35 մլն iPad:
2014-ի առաջին եռամսյակի տվյալներով՝ Samsung-ի մաքուր շահույթն աճել է 5.8 տոկոսով՝ հասնելով 7.3 մլրդ դոլարի, իսկ եռամսյակային եկամուտն ավելացել է 1.5 տոկոսով՝ հասնելով 52 մլրդ դոլարի:
