Washington Post-ի և ABC News-ի անցկացրած հարցումները ցույց են տվել, որ ամերիկացիները չեն աջակցում տնտեսության և առողջապահության ոլորտներում իրենց նախագահի վարած քաղաքականությանը, ինչպես նաև Ուկրաինայի ճգնաժամի հետ կապված նրա գործողություններին: Հարցման արդյունքները ցույց են տալիս, որ Օբամայի վարկանիշը հունվարից մարտ ընկած ժամանակահատվածում 46%-ից հասել է 41%-ի, որն էլ նրա նախագահության տարիների նվազագույն արդյունքն է:
Հարցվածների միայն 42%-ն է հավանության արժանացնում Օբամայի քաղաքականությունը, և միայն 34%-ն է համաձայն Ուկրաինայի ճգնաժամին նրա միջամտության հետ: Լուրջ դժգոհություններ են առաջացրել նաև առողջապահության ոլորտում Օբամայի անցկացրած բարեփոխումները, որոնք ավելի հայտնի են որպես ObamaCare, դրա օգտին քվերակել է հարցվածների միայն 37%-ը:
Ամերիկացիները հոռետեսորեն են վերաբերվում նաև նախագահի վարած տնտեսական քաղաքականությանը, որին կողմ է քվեարկել հարցվածների միայն 28%-ը:
Ինչպես հաղորդում է պարբերականը՝ այս վիճակագրությունը նոյեմբերին կայանալիք խորհրդարանական ընտրություններին դեմոկրատների համար անհանգստացնող ազդանշան պետք է լինի: Դեմոկրատական կուսակցության համար ընտրություններին գլխավոր հակառակորդը հանրապետականներն են:
Անցկացված հարցումները ցույց են տվել նաև, որ ամերիկացիները միջին խավի կյանքի պայմանների բարելավման, կանանց և այլ կարևոր խնդիրների լուծման համար ավելի հակված են դեմոկրատներին վստահել: Սակայն մինչև այժմ դեմոկրատները Օբամայի գլխավորությամբ այս ոլորտների խնդիրների լուծման համար կարևոր որոշումներ չեն կայացրել:
