Ուկրաինայի Կենտրոնական ընտրական հանձնաժողովը հաշվարկել է արձանագրությունների 86,83 տոկոս: Հաշվարկի արդյունքում՝ ընտրություններում առաջատարը Ռեգիոնների կուսակցությունն է՝ ընտրողների 31.85 տոկոսի աջակցությամբ: «Բատկիվշինա» միացյալ ընդդիմությանն են իրենց ձայնը տվել ուկրաինացիների 24.2 տոկոսը: Ուկրաինայի Կոմունիստական կուսակցությունը ստացել է ձայների 13.89, Վիտալի Կլիչկոյի «ՈՒԴԱՌ»-ը՝ 13.46,«Ազատության» ազգայնականները՝ 9.6 տոկոսը: Այս մասին հայտնում է РБК-Украина-ն:
Գերագույն ռադայի ընտրություններին մասնակցած մյուս 16 կուսակցությունները չեն կարողացել հաղթահարել 5 տոկոսի շեմը: Դրանց թվում է եղել նաև երկրի նախկին նախագահ Վիտոր Յուշչենկոյի կազմակերպությունը: Արձանագրությունների 90 տոկոսի հաշվարկի արդյունքում՝ «Մեր Ուկրաինան» կարողացել է ընդամենը 1.06 տոկոս ձայն հավաքել:
Ուկրաինայում խորհրդարանական ընտրությունները 2002 թվականից հետո առաջին անգամ անցկացվել են խառը համակարգով՝ 225 պատգամավոր կընտրվի կուսակցական ցուցակներով, նույնքանը՝ մեծամասնական: Պատգամավորական աթոռների համար պայքարել է ավելի քան 5000 թեկնածու:
