Օրեր առաջ Նուբարաշեն ՔԿՀ-ում հացադուլ հայտարարած 4 դատապարտյալներից և կալանավորներից մեկը դադարեցրել է հացադուլը: Հոկտեմբերի 21-ին հացադուլ էր հայտարարել ԼՂՀ քրեական օրենսգրքի 177հ. 3-րդ (գողություն) և 165հ. 4-րդ (անչափահասին հանցանքի կատարմանը ներգրավելը) մասով 6 տարվա ազատազրկման դատապարտված Սերոբ Մխիթարյանը, որն արդեն դադարեցրել է հացադուլը:
«Առաջին լրատվական»-ի հետ զրույցում այս մասին ասաց ԱՆ քրեակատարողական վարչության լրատվական վարչության պետ Գոռ Ղլեչյանը: Նա հավաստիացրեց, որ մյուս կալանավոր, դատապարտյալները գտնվում են բժիշկների անմիջական հսկողության տակ: Ըստ Գ. Ղլեչյանի՝ հսկողության տակ է նաև ճկույթը կտրած դատապարտյալը:
Հիշեցնենք, որ շարունակում է հացադուլը նախկինում երկու անգամ դատապարտված, «Նուբարաշեն» ՔԿՀ կալանավոր Արթուր Խաչատրյանը (մեղադրվում է ՀՀ քրեական օրենսգրքի 132հ. 1-ին (մարդու թրաֆիքինգ) և 182հ. 1-ին մասի (շորթում) հատկանիշներով), որը հացադուլ էր հայտարարել հոկտեմբերի 22-ին՝ ժամը 18:00-ին: Ըստ դիմումի` բողոքում է իր նկատմամբ հարուցված քրեական գործի ընթացքից: Նույն օրը հացադուլ հայտարարելու մասին դիմումներ էին ներկայացրել ևս մեկ կալանավոր և մեկ դատապարտյալ:
Կալանավոր Վարդան Դեմիրճյանը (մեղադրվում է ՀՀ քրեական օրենսգրքի 34-104հ. 2-րդ մասի 1 և 6 կետերով (սպանության փորձ), 185հ. 3-րդ (գույքը դիտավորությամբ ոչնչացնելը կամ վնասելը, որն առանձնապես խոշոր չափերի վնաս է պատճառել) և 325հ. 1-ին մասի (պաշտոնական փաստաթուղթ կեղծելը) հատկանիշներով) նույնպես բողոքում է քրեական գործի ընթացքից:
Ինչպես ավելի վաղ տեղեկացրել էինք, դատապարտյալ Կարեն Թառոյանը, որը ճկույթն էր օրեր առաջ կտրել, 2005թ. մայիսի 29-ին ՀՀ քրեական օրենսգրքի 112հ. 2-րդ մասի 14 կետով (դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահ) 9 տարվա ազատազրկման է դատապարտվել, անհիմն պահանջներ է ներկայացրել: Ավելին, ամիսներ առաջ, պատճառաբանելով մոր և կնոջ լարված հարաբերությունները, կտրել էր ձախ ձեռքի ճկույթի միջին հատվածը:
