Հայաստանում եղանակի ցրտելու հետ մեկտեղ ի հայտ են եկել մի շարք վիրուսային հիվանդություններ: Իսկ առաջին վիրուս ընդունողները երեխաներն են: Այս մասին «Առաջին լրատվական»-ի հետ զրույցում նշեց Էրեբունի բժշկական կենտրոնի համաճարակաբան Անահիտ Սարգսյանը.
«Եղանակի փոփոխության հետ մեկտեղ երեխաների մոտ ի հայտ են գալիս սուր շնչառական, վիրուսային, մրսածության ֆոնի հիվանդություններ: Երեխան վարակվում է շփման միջոցով, այդ պատճառով խուսափե՛ք մրսած կամ վարակված երեխային մանկապարտեզ տանելուց, որովհետև մյուս երեխաներն էլ են վարակվում նույն խաղալիքների հետ շփման արդյունքում: Երեխաների օրգանիզմը, ի տարբերություն մեծերի, ավելի զգայուն է, մրսածության ֆոնի վրա կարող է ի հայտ գալ անգամ կարմրուկ, կարմրախտ»,- նշեց Ա. Սարգսյանը:
Տիկին Սարգսյանը տեղեկացրեց նաև, որ երեխայի մոտ մրսածության և վիրուսի արտահայտման առաջին ախտանշանը տրամադրության կտրուկ անկումն է. «Երբ երեխան մի խաղալիքը շատ էր սիրում նախկինում, հիմա այլևս այդ խաղալիքով չի խաղում, հաց չի ուտում, հրաժարվում է ամեն տեսակի այն զբաղմունքներից, որոնք միշտ շատ սիրել է, նշանակում է նրա մոտ ի հայտ են գալիս մրսածության առաջին ախտանիշները: Մեկ-երկու օր հետո արդեն կսկսի հազալ, փռշտալ և հնարավոր է նաև ջերմության բարձրացում: Այդ պատճառով մայրիկներին խորհուրդ եմ տալիս առավել ուշադիր լինել և երեխայի մոտ նման վարքագիծ նկատելու դեպքում թեյ տալ, հնարավորինս տաք հագցնել, որպեսզի հիվանդությունն էլ ավելի չզարգանա»:
Ինչ վերաբերում է մեծերին, ապա այս օրերին քաղաքում շատ են գրիպով վարակվածության դեպքերը: Անահիտ Սարգսյանը նշեց, որ շատ դեպքերում մարդը ունենում է նաև թաքնված հիվանդություններ, և դրանք մրսածության ֆոնի վրա արտահայտվում են:
Բժշկուհի Ինգա Բաղդասարյանն էլ «Առաջին լրատվական»-ի հետ զրույցում նշեց, որ եթե մարդը ունի ստամոքսի, աղիների և առհասարակ ցանկացած բնույթի առողջական խնդիրներ, ապա գրիպով վարակվելու, մրսելու, ջերմություն ունենալու դեպքում դրանք արտահայտվելու են և ավելի խորանալու.
« Հիմա քաղաքում տարածված է գրիպի մի տեսակ, որն ուղեկցվում է բարձր ջերմությամբ, հազով, կոկորդի ցավով: Այդ պատճառով շնչառական ուղիներում անհանգստություն զգալու, նույնիսկ գխացավ և դող զգալու դեպքում աշխատե՛ք տաք թեյ և կաթ խմել, դրանք մրսածության կամ վարակվածության առաջին ախտանիշներն են»- եզրափակեց Բաղդասարյանը:
