Բելառուսի նախագահի նախկին թեկնածու, ընդդիմադիր Անդրեյ Սաննիկովն ապաստան է խնդրել Մեծ Բրիտանիայից: Քաղաքական գործիչը, որը գլխավորում է «Եվրոպական Բելառուս» շարժումը, այդ որոշումը բացատրել է, նրանով, որ իրեն ազատազրկում է սպառնում:
«Ինձ համար դա հեշտ որոշում չէ: Սակայն, հավատացեք, այլ ելք չկա: Կա՛մ կրկին բանտում ենթարկվել խոշտանգումների և ծաղրուծանակի, կա՛մ նստել ձայնը կտրած»,- հայտարարել է Սաննիկովը: Նա նշել է, որ արտասահմանում կշարունակի քաղաքական գործունեությունը և կփորձի հասնել այն բանին, որ Բելառուսում ժողովրդավարության հաստատման կոնկրետ միջոցառումներ ձեռնարկվեն:
Նախագահի նախկին թեկնածուն կարծիք է հայտնել, որ իր հեռանալը կնպաստի իր կնոջ և որդու իրական ազատությանը, որոնք «Լուկաշենկոյի վարչակարգի պատանդն են»:
Սաննիկովի կինը՝ ընդդիմադիր լրագրողուհի Իրինա Խալիպը, հայտարարել է, որ չի պատրաստվում մեկնաբանել իրավիճակը: «Այս փուլում այդպես ավելի անվտանգ է մեր ընտանիքի համար»,- ասել է նա:
Անդրեյ Սաննիկովը նախկինում զբաղեցնում էր Բելառուսի փոխարտգործնախարարի պաշտոնը: 1996 թ. նա հրաժարական տվեց՝ բողոքելով նախագահի լիազորություններն ընդլայնած հանրաքվեի դեմ: Հրաժարականից հետո նա սկսեց զբաղվել ընդդիմադիր գործունեությամբ՝ դառնալով «Եվրոպական Բելառուս» շարժման հիմնադիրներից մեկը:
2010 թ. նախագահական ընտրություններից հետո Սաննիկովն ու նրա կինը ընտրությունների կեղծված արդյունքների դեմ կազմակերպված ցույցի ժամանակ ձերբակալվեցին: Ավելի ուշ նախագահի թեկնածուն դատապարտվեց 5 տարվա, իսկ նրա կինը՝ 2 տարվա ազատազրկման։
2012 թ. գարնանը Սաննիկովին ներում շնորհվեց: Նրա կինն այժմ գտնվում է Մինսկում: Դատարանի որոշմամբ նրա իրավունք չունի լքել քաղաքը:
