Time Turk-ի փոխանցմամբ՝ ԱՄՆ պետքարտուղարի տեղակալի Եվրոպայի և Եվրասիայի հարցերով օգնական Էրիկ Ռուբինը, ելույթ ունենալով Վաշինգտոնում, անդրադարձել է ռուս-վրացական հարաբերությունների կարգավորման խնդրին.
«Վաշինգտոնը մտադիր է աջակցել Վրաստանի նոր իշխանություններին՝ հարևան երկրների, այդ թվում՝ նաև Ռուսաստանի հետ հարաբերությունները կարգավորելու հարցում: Վերջին ժամանակներս ձեռնարկվել են առաջին դրական քայլերը փոխադարձ վստահության հաստատման և երկու կողմից էլ լարվածության ու անվստահության նվազեցման համար:
Այդ քայլերի թվում են Առևտրի համաշխարհային կազմակերպությանը (ԱՀԿ) Ռուսաստանի անդամակցելուն Վրաստանի համաձայնություն տալը, սահմանների բացումը, օդային հաղորդակցության վերականգնումը, Վրաստանի կողմից Ռուսաստանի քաղաքացիների համար գործող վիզային ռեժիմը:
Մենք հավատում ենք, որ կարելի է ավելի շատ բան անել, և մենք աջակցելու ենք Վրաստանի նոր կառավարությանը՝ բոլոր հարևանների հետ իր հարաբերությունների բարելավման ու զարգացման հարցում: Վաշինգտոնում հակասություն չեն տեսնում վրաց-ամերիկյան և ռուս-վրացական հարաբերությունների զարգացման մեջ:
ԱՄՆ-ն աջակցում է Վրաստանի ինքնիշխանությանն ու տարածքային ամբողջականությանը միջազգայնորեն ճանաչված նրա սահմաններում: Մենք շարունակում ենք Ռուսաստանին կոչ անել կատարել 2008 թվականին ստանձնած պարտավորությունները, և զորքերը հետ քաշել նախկին բնագծերը, ինչպես նաև միջազգային միջնորդներին թույլ տալ մուտք գործել վարչական սահմանային գիծ»:
