Հայաստանի տնտեսական ակտիվության այս տարվա 7.7 տոկոսանց աճը վատ ցուցանիշ չէ, բայց խնդիրն այն է, որ պետք է բնակչությունն իր մաշկի վրա զգա այդ աճը. այս մասին այսօր լրագրողների հետ հանդիպմանն ասաց սպառողների միության նախագահ Արմեն Պողոսյանը: Նա նշեց, որ Ազգային վիճակագրական ծառայությունը պետք է առանձնացնի 20-25 տեսակի ամենաանհրաժեշտ ապրանքներն ու ծառայությունները և դրանց շրջանակում հաշվարկի գնաճը:
«Պետք է տեսնենք` որքանով է առաջին անհրաժեշտության ապրանքի թանկացումն ազդում սպառողական զաբյուղի վրա, քանի որ ընդհանուր հաշվարկի ժամանակ շատ աճպարարություններ կան»,- ասաց նա:
Արմեն Պողոսյանի խոսքով` այսօր երկրում ունենք 45 տոկոս աղքատ բնակչություն, որին մատչելի չէ նորմալ սնունդը, հեռախոսվ խոսելն ու տրանսպորտից օգտվելը: «Աղքատ խավի սննդկարգում գերակշռում են հացն ու կարտոֆիլը, ինչը առողջ սնունդ չէ հատկապես երեխաների համար»,- ընդգծեց նա:
Սպառողների միության նախագահը ծաղր է համարում նվազագույն աշխատավարձը 32,500-ից 35,000 դրամ սահմանելը: Նա նշեց, որ մի կողմից կառավարող կուսակցությունն ասում է, թե չունեն հնարավորություն` բարձրացնելու աշխատավարձերը, բայց մյուս կողմից էլ չունեն հստակ ժամանակացույց, թե երբ պետք է նվազագույն աշխատավարձի չափը հասնի կենսապահովման սպառողական զամբյուղին և մի բան էլ գերազանցի զաբյուղի չափը:
Ըստ բանախոսի` հացը, շաքարավազն ու մնացած առաջնահերթ անհրաժեշտության ապրանքները թանկանում են կրիմինալ ձևով: Սպառողների միությունը նամակով դիմել է նախագահի վերահսկողական ծառայությանը` խնդրելով համատեղ ստուգայցեր կազմակերպել և կրիմինալ թանկացումների դեմն առնել: Արմեն Պողոսյանի համոզմամբ` մի շարք շուկաներում իրոք կրիմինալ կա, օրինակ` շաքարավազի հետ ջուր են խառնում և վաճառում մարդկանց:
Անդրադառնալով գազի գնի խնդրին` սպառողների իրավունքների պաշտպանը նշեց, որ գազի գնի թանկացումը կանդրադառնա հացի և մնացած սննդամթերքի գնի բարձրացման վրա: «Գազի գինը որոշվում է Կրեմլում, մենք գրեթե չեն կարող որևէ ազդեցություն ունենալ դրա վրա: Մենք պետք է մտածենք, թե ինչ ունի մեր երկիրը դրան հակազդելու և այդ գինը կոմպենսացնելու համար»,- ասաց նա` հավելելով, որ իշխանությունները ձգձգում են, որպեզի սեզոնի ավարտից և ընտրություններից հետո թանկացնեն գազի գինը:
Լուսանկարը՝ PanARMENIAN Photo-ի
