Այսօր Ազգային ժողովի հերթական քառօրյայի նիստի ժամանակ «Ժառանգություն» խմբակցության ղեկավար Ռուբեն Հակոբյանը հայտարարեց, որ «Ազատ դեմոկրատներ» կուսակցության նախագահ Խաչատուր Քոքոբելյանն այլևս իրենց խմբակցության անդամ չէ: Վերջինս իր հերթին հայտարարեց, թե ինքը և իր գործընկեր Ալեքսանդր Արզումանյանը այսուհետ թեև ֆորմալ առումով մնալու են խմբակցությունում, բայց ներկայացնելու են «Ազատ դեմոկրատներ» կուսակցությունը: Նա նաև հայտարարեց` խմբակցության նիստում առաջարկել է, որ խմբակցությունը, Ռուբեն Հակոբյանի փոխարեն, ղեկավարի Զարուհի Փոստանջյանը: Այս հարցերի հետ կապված զրուցեցինք Խ. Քոքոբելյանի հետ:
– Պարոն Քոքոբելյան, ի վերջո` ո՞րն է «Ազատ դեմոկրատներ» և «Ժառանգություն» կուսակցությունների ապահարզանի իրական պատճառը:
– Նախ` ապահարզան բառն այս դեպքում իմ բառապաշարում չկա: ԱԺ դահլիճում շատ հստակ հայտարարեցի, որ ես և պարոն Արզումանյանը ֆորմալ առումով կմնանք «Ժառանգություն» խմբակցության մեջ, բայց կներկայացնենք «Ազատ դեմոկրատները»: Իհարկե, ի սկզբանե ենք այդ խմբակցությունում ներկայացրել «Ազատ դեմոկրատներին»: «Ժառանգություն» խմբակցությունը, ինչպես գիտեք, ձևավորվել է «Ազատ դեմոկրատներ» և «Ժառանգություն» կուսակցությունների և հասարակության կողմից այդքան չարչրկված հանրային սեկտորի կողմից: Նախընտրական շրջանում խոսակցություն կար, որ մենք որպես միասնական թիմ, նաև` որպես դաշինք ենք հանդես գալիս: Միայն ընտրություններին նախորդող վերջին օրերին զուտ քաղաքական նկատառումներով և տակտիկական առումով որոշեցինք միասնական ցուցակով հանդես գալ: Մենք կուսակցության կողմից մեր բոլոր ջանքերը գործադրեցինք, որ դաշինքը պառակտման չգնա: Իսկ թե որ խմբին է դա ձեռնտու` ես չեմ ուզում այդ հարցին պատասխանել: Միայն կասեմ, որ մենք մեր գործունեությունը խիստ քաղաքական հարթության մեջ ենք տեսնելու: Սա զուտ անձնական խնդիր չէ, որքան էլ որոշ ընկերներ ցանկանան այդպես ներկայացնել:
– Ամեն դեպքում` ո՞րն է այդ պառակտման կոնկրետ պատճառը:
– Պատճառների մասին ես առայժմ չեմ խոսի: Մենք պարտավոր ենք այդ մասին տեղեկացնել հանրությանը, բայց այս պահին դեպքերից առաջ չեմ ընկնի:
– Իսկ ինչո՞ւ եք առաջարկում, որ Ռ. Հակոբյանի փոխարեն խմբակցությունը ղեկավարի Զարուհի Փոստանջյանը:
– Հենց առաջին օրը` մեր խմբակցության նիստին, առաջարկել եմ, որ Զ. Փոստանջյանը ներկայացնի խմբակցությունը, բայց իմ առաջարկությունը չընդունվեց: Ռ. Հակոբյանի հետ անձնական որևէ խնդիր չունեմ, պարզապես իմ պատկերացմամբ` մեր խմբակցությունն այս պահի դրությամբ ավելի լավ կարող էր ղեկավարել Զ. Փոստանջյանը: Եթե Ր. Հովհաննիսյանը գար ԱԺ, տրամաբանական կլիներ, որ նա ղեկավարեր խմբակցությունը:
– Տրամաբանակա՞ն է, որ խորհրդարան անցած կուսակցության ղեկավարը չլինի իր խմբակցության կողքին:
– Ի սկզբանե մենք դեմ ենք եղել, որ Ր. Հովհաննիսյանը հրաժարվի մանդատից, կարծում եմ` այս փուլում դրա մասին խոսելն արդեն ուշացած է:
– Րաֆֆի Հովհաննիսյանը հայտարարել էր, որ Դուք նախնական պայմանավորվածություն եք ունեցել, թե ընտրություններից հետո երկուսով վայր կդնեք մանդատը: Ի վերջո` նման խոսակցություն եղե՞լ է:
– Ես այդ հարցի պատասխանը տվել եմ և հստակ ասում եմ, որ երբևիցե նման պայմանավորվածություն չի եղել, որ ես պետք է հրաժարվեմ մանդատից:
– Հնարավո՞ր է, որ «Ժառանգության» հետ այս պառակտումից հետո ՀԱԿ-ի հետ ավելի սերտորեն համագործակցեք:
– Ընդդիմադիր դաշտի որևէ ներկայացուցչի հետ անձնային խնդիր չենք ունեցել: Մենք հանրության առջև քաղաքական պարտավորություն ունենք և հայտ ենք ներկայացրել ընդդիմադիր դաշտում: Կարծում եմ` ցանկացած մարդ ինչ մեսիջներով եկել է քաղաքական դաշտ, պարտավոր է իր մեսիջներին տեր կանգնել:
– Նախագահական ընտրություններից առաջ կարծես թե արևմտյան կողմնորոշում ունեցող քաղաքական ուժերը առանձնանում են: Հնարավո՞ր է, որ նման դաշինքում լինեք:
– Իմ պատկերացումներն ու ընկալումները թույլ են տալիս հասկանալ, որ այսօր Հայաստանում` հատկապես լրագրողների որոշ շերտի, նույնիսկ քաղաքական գործիչների կողմից արևմտյան բլոկ կամ արժեհամակարգ արտահայտությունները շատ արհեստականորեն են շրջանառվում: Մենք բազմիցս առիթ ունեցել ենք հայտարարելու, որ ՀՀ ցանկացած քաղաքացի պարտավոր է իր գործողություններն ու գործունեությունը համապատասխանեցնել միայն ՀՀ շահերին: Թե դա որքանով համատեղելի կլինի այդ երկրների կամ գերտերությունների իրականացվող քաղաքականությանը` այլ խնդիր է: Ես միայն կարող եմ ասել, որ որպես «Ազատ դեմոկրատներ»-ի նախագահ և անդամ, որտեղ որոշումները կոլեգիալ սկզբունքով են ձևավորվում, միշտ քաղաքական գործունեության հիմքում ունեցել ենք մի խնդիր` առաջնորդվել հանուն ՀՀ շահերի և հասարակությանը այսօր հուզող խնդիրների:
– Իսկ այս միջադեպից հետո նախագահական ընտրություններին կսատարե՞ք Ր. Հովհաննիսյանին, եթե նա առաջադրվի:
– Այս պահի դրությամբ նման հարցադրում պարզապես չարժե անել: Կա մի խնդիր` եթե Ր. Հովհաննիսյանը իր լայն նախընտրական ծրագրում մեր պատկերացրած` մինչև այս պահը բոլոր ծրագրային պայմանավորվածությունները վեր հանի, որը մեզ հոգեհարազատ կլինի, ես այդ հարցը մեր կուսակցության վարչության նիստում քննարկելու որևէ անձնական խնդիր չեմ տեսնում:
– Հակառակ դեպքում ա՞յլ ընդդիմադիր թեկնածուի կպաշտպանեք:
– Քաղաքական դեպքերի զարգացումները ցույց կտան նաև մեր գործողությունների ընթացքը: Այսօր ՀՀ-ում այնպիսի ժամանակաշրջան է, որ բոլոր քաղաքական գործընթացները կապված են նախագահի ընտրություններին նախորդող զարգացումների հետ: Ակնհայտ է, որ մենք բացառապես ընդդիմադիր դաշտում միասնական թեկնածու ունենալու կողմնակիցն ենք: Ես առիթ ունեցել եմ ասելու, որ միասնական թեկնածու չի նշանակում, թե 18 կամ 26 քաղաքական ուժեր նրան կպաշտպանեն: Կարող են 2-3 քաղաքական ուժեր պաշտպանել, բայց հասարակության կողմից նա ընկալվի այն թեկնածուն, որը կկարողանա ներկայացնել սոցիալական բոլոր խավերի շահերը…
Ստեղծվել է մի իրավիճակ, որ շատ գործիչներ, նույնիսկ իմ ընկերները հայտարարում են, որ այսօր Հայաստանում չկա ընդդիմություն: Ես այդ կարծիքին չեմ: Իմ կարծիքով` այսօր ՀՀ-ում ընդդիմությունը դեռևս չի կարողացել դառնալ այն գործոնը, որ ընտրությունների միջոցով իշխանափոխություն պարտադրի: Եվ մենք` որպես քաղաքական ուժ, և ես` որպես քաղաքական գործիչ ու ՀՀ քաղաքացի, իմ ողջ գործունեությունը, ունակություններն ուղղելու եմ ի շահ հասարակության մեջ ձևավորված այն պահանջարկի, որ ՀՀ-ում ընտրությունների միջոցով տեղի ունենա իշխանափոխություն, ընտրությունների արդյունքում այնպիսի ուժ գա իշխանության, որը, իմ պատկերացմամբ, կկարողանա ներկայացնել հասարակության լայն շերտերի շահերը և հետամուտ կլինի Հայաստանում գոյություն ունեցող խնդիրների լուծմանը:
Լուսանկարը՝ PanARMENIAN Photo-ի
