Կոլումբիայում իր խանութները երկու միլիարդ եվրոյով վաճառելու մասին տեղեկության տարածումից հետո ֆրանսիական Carrefour առևտրային ցանցի բաժնետոմսերի արժեքը բարձրացել է 6 տոկոսով: Այս մասին հաղորդում է AFP-ն: Ընկերության տվյալներով՝ Կոլումբիայում իր խանութների շնորհիվ 12 ամսում (2012-ի հունիսի 30-ի դրությամբ) աշխատել է 1,5 միլիարդ եվրո:
Carrefour-ը հայտարարել է, որ իր 72 հիպերմարկետները, 16 ոչ մեծ խանութները, ինչպես նաև 4 մանրամեծածախ խանութները վաճառում է Cencosud չիլիական խմբին: Ընկերությունը, ընտրելով նոր ռազմավարություն, որոշել է վաճառել իր ակտիվները՝ կենտրոնանալու համար այն շուկաների վրա, որտեղ նա ունի կամ պատրաստվում է հասնել առաջատար դիրքերի:
Carrefour-ը մանրածախ առևտրի ծավալով երկրորդն է աշխարհում՝ Walmart-ից հետո:Վերջին տարիներին ընկերությունը ակտիվորեն նվազեցնում է իր ներկայությունը աշխարհի մի շարք տարածաշրջաններում:
Այսպես. 2012-ի օգոստոսի վերջին ցանցը հայտարարել է Սինգապուրում բիզնեսից դուրս գալու մասին, որտեղ այն բացել էր առաջին հիպերմարկետը: Դրանից առաջ Carrefour-ը լքել էր տնտեսական ճգնաժամում հայտնված Հունաստանը: 2009 թվականին ընկերությունը հայտարարել էր Ռուսաստանից իր բիզնեսը դուրս բերելու մասին, սակայն այդպես էլ չի կարողացել վաճառել իր խանութները: Հաստատությունների սեփականատերերը դրանք վարձակալության են հանձնել այլ ցանցերի:
Վերջին շրջանում Carrefour-ը գրանցում է նվազ ֆինանսական արդյունքներ: 2011 թվականին ընկերությունը նվազեցրել է շահույթի ցուցանիշները14,3 տոկոսով՝ հասցնելով 371 միլիոն եվրոյի:
Cencosud-ը Հարավային Ամերիկայի խոշորագույն ռիթեյլերն է (մանրածախ առևտուր իրականացնող): Ընկերությունը տեղակայված է Չիլիում, սակայն խանութներ ունի նաև Արգենտինայում, Բրազիլիայում, Պերուում և Կոլումբիայում:
Հիշեցնենք, որ սեպտեմբերի 13-ին ֆրանսիական հայալեզու «Յառաջ» օրաթերթը տեղեկացրել էր Հայաստանի պարենային առևտրի ոլորտում սպասվող հեղաշրջման մասին: Ըստ աղբյուրի տեղեկությունների՝ ընթացիկ տարվա նոյեմբերին մայրաքաղաք Երևանում բացվելու է ֆրանսիական Carrefour SA ընկերության առաջին սուպերմարկետը: Վաճառակենտրոնն ունենալու է 10.000 քառակուսի մետր տարածք՝ Dalma Garden Mall առևտրի կենտրոնում, որը պատկանում է «Տաշիր» ընկերությանը։ Թերթի վկայությամբ՝ համաշխարհային մանրածախ առևտրի ցանցում Carrefour-ը Եվրոպայում առաջինն է, աշխարհում՝ երկրորդը:
