Եվրամիության այսօր մեկնարկած երկօրյա գագաթնաժողովը կքննարկի Իսպանիային հնարավոր օգնություն տրամադրելու հարցը: Իսպանիան երկար ժամանակ չէր ցանկանում օգնություն խնդրել՝ զգուշանալով այդպիսի աջակցության համար պարտադրվող կոշտ պայմաններից, որոնք կարող են վատթարացնել ներքաղաքական իրավիճակը:
Հոկտեմբերի 16-ին Մադրիդը բարեհաջող կերպով 4.9 մլրդ եվրոյի արժեթղթեր տեղադրեց՝ ավելի շատ, քան նախատեսվում էր, և ավելի ցածր գործակցով, քան մեկ ամիս առաջ: Դեռ 4.5 մլրդ եվրո էլ իշխանությունները պատրաստվում են ներգրավել պարտքային շուկայից։ Այս մասին հաղորդում է RBK daily-ն:
Սակայն փորձագետները կարծում են, որ շուկաների վրա հույս դնելը հազիվ թե իրեն արդարացնի: Իսպանական պետական պարտատոմսերի եկամտաբերության նվազումը ստիպել է Եվրոպական կենտրոնական բանկի ղեկավար Մարի Դրագիին խոստանալ անել ամեն բան՝ եվրոն փրկելու համար: Եթե այդ խոստումները նյութականացվեն և բավարար չափով, պարտատոմսերի եկամտաբերությունը կրկին կտրուկ կբարձրանա- նշել է Capital Economics-ի տնտեսագետ Ջոնաթան Լոյնսը: Արդյունքում Իսպանիայի ֆինանսների նախարարության ներկայացուցիչներն այս շաբաթ ակնարկել են, որ երկիրը պատրաստ է օգնություն խնդրել՝ չնայած հատուկ ձևով: Նրանք ցանկանում են, որպեսզի ESM-ն իրենց համար վարկային գիծ բացի (առանց դրա չափը նշելու), ինչը հնարավորություն կտա ԵԿԲ-ին սկսել գնել պետական պարտատոմսերը երկրորդական շուկայում:
Իսպանիայում հույս ունեն, որ իրենք ստիպված չեն լինի շատ ամուր ձգել գոտիները, քանի որ ԱՄՀ-ն, որը եվրոպացիներին օգնում է մշակել փրկության ծրագրեր, վերջերս եկել է այն եզրակացության, որ չափազանց շատ տնտեսումն ավելի շուտ վնասում է տնտեսությանը, քան օգնում:
Սակայն այժմ էլ Իսպանիային օգնություն տրամադրելու անհրաժեշտության մեջ տատանվում է Գերմանիան. կանցլեր Անգելա Մերկելը մտավախություն ունի, որ դա միայն կշեղի ներդրողների ուշադրությունը Իտալիայի խնդիրներից և կհանգեցնի պարտքային ճգնաժամի նոր սրման:
