Եթե գալիք նախագահական ընտրություններում Լևոն Տեր-Պետրոսյանը չառաջադրի իր թեկնածությունը, լուրջ փոփոխություններ են սպասվում: Այս մասին այսօր «Առաջին լրատվական»-ի հետ զրույցում ասաց Հայ ազգային կոնգրեսի մաս կազմող «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը:
Ս. Գիմիշյանը նաև ասաց, որ իր ղեկավարած կուսակցությունն իր սեփական թեկնածուն չի ունենա նախագահական ընտրություններում: Ըստ նրա՝ ՀԱԿ-ն ունի լիդեր՝ ՀՀ առաջին նախագահ Լևոն Տեր-Պետրոսյանը, ով որպես առաջնորդ պարտավոր է առաջադրել իր թեկնածությունը: Բայց, նրա կարծիքով, որոշումը ՀԱԿ ղեկավարինը պետք է լինի:
«Եթե ՀԱԿ ղեկավարը որոշում կայացնի չառաջադրել իր թեկնածությունը գալիք նախագահական ընտրություններին, չեմ տեսնում տարբերակ, որ ՀԱԿ-ն այլ կուսակցությունից կամ ԲՀԿ-ից որևէ թեկնածուի պաշտպանի: Մեր կուսակցությունն այլ թեկնածու չի տեսնում, կարծում եմ՝ այդպես էլ կլինի՝ ՀԱԿ-ն այլ կուսակցությունից թեկնածուի չի պաշտպանի: Եթե Լևոն Տեր-Պետրոսյանը չառաջադրի իր թեկնածությունը, կարծում եմ՝ լուրջ փոփոխություններ են սպասվում, բայց այլ թեկնածու չեմ կարծում, որ լինի, համենայնդեպս՝ մեր կուսակցությունն այդ թեկնածուին չի պաշտպանի»,- մեկնաբանեց Սոս Գիմիշյանը՝ հիշեցնելով, որ եթե ՀԱԿ-ի կազմում որևէ կուսակցություն դեմ եղավ որևէ որոշման, ապա այն չի կայացվի:
Հարցին, թե ինչպես է ինքը վերաբերվում ՍԴՀԿ ներկայացուցիչ Գուրգեն Եղիազարյանի կարծիքին, որ եթե Լևոն Տեր-Պետրոսյանը որոշում կայացնի պաշտպանել ԲՀԿ թեկնածուին, ուրեմն պետք է պաշտպանել՝ Գիմիշյանը պատասխանեց, որ դա Գուրգեն Եղիազարյանի անձնական կարծիքն է. «ՀԱԿ-ում մինչ այս նման քննարկումներ չեն եղել»։
