Բնության պահպանության միջազգային միության կողմից հրապարակված հաշվետվության մեջ նշվում է, որ «Կարմիր գրքում» ներառվել են ավելի քան 400 տեսակի, անհետացման եզրին գտնվող բույս և կենդանի:
Անհետացման եզրին գտնվող կենսաբանական տեսակների ցանկում ներառված են Եգիպտոսում հանդիպող փշապոչ կրիան, չինական Սիչուան նահանգի գետերում հանդիպող թայմեն տեսակի ձուկը, ինչպես նաև մոտ 150 տեսակի արմավենի Մադագասկար կղզուց: Անհետացող տեսակների մասին տեղեկատվությունը հավաքվել է ՄԱԿ-ի անդամ բոլոր երկրներից, 2 տարվա ընթացքում:
Այսօր «Կարմիր գրքում» գրանցված է 20 212 տեսակ: Այսպիսով՝ Երկրի վրա ապրող կաթնասունների քառորդ մասը, թռչունների 13 %-ը, 41 % երկկենցաղներ և 33 % բուսատեսակներ գտնվում են անհետացման վտանգի տակ:
Փորձագետների կարծիքով՝ բնությանը հասցված վնասները վերացնելու համար մինչև 2020 թ. միջազգային հանրությունից կպահանջվեն 440 մլրդ դոլարի վճարումներ:
