Արցախցի քաղաքագետ, ԼՂՀ նախկին փոխարտգործնախարար Մասիս Մաիլյանը կարծում է, որ ԵԱՀԿ Մինսկի խմբի շրջանակներում և ստեղծված պայմաններում Ղարաբաղյան հակամարտության լուծման ուղղությամբ հնարավոր չէ որևէ դրական արդյունքի հասնել:
Այս մասին «Առաջին լրատվական»-ին ասաց Մասիս Մաիլյանը` պատասխանելով այն հարցին, թե Ֆրանսիայի արտգործնախարարության` հակամարտության լուծմանն աջակցելու և Հայաստանի ու Ադրբեջանի ղեկավարության հետ հանդիպումներ կազմակերպելու վերաբերյալ հայտարարությունն ի՞նչ արդյունք կարող է տալ:
«Մեկ անգամ չի ասվել այն մասին, որ ԵԱՀԿ Մինսկի խմբի մոտեցումները հակասում են հայկական կողմի հետաքրքրություններին և խոչընդոտում տարածաշրջանում խաղաղության հաստատմանը: Իսկ բոլորովին վերջերս Բաքվի և Բուդապեշտի միջև կայացած հանցավոր գործարքը ևս մեկ անգամ ցույց տվեց, որ Ադրբեջանի` միջազգային և ազգային պաշտոնյաներին կաշառելու քաղաքականությունը վտանգ է ներկայացնում Հայաստանի և Արցախի անվտանգությանը»,- ընդգծեց նա:
Հարցին ի պատասխան, թե ի՞նչ պայմաններ կարող է հայկական կողմը թելադրել այս իրավիճակում, Մասիս Մաիլյանը նշեց, որ Հայաստանը պետք է դադարեցնի իր մասնակցությունը Մինսկի բանակցային գործընթացին: Բանակցությունները վերսկսելու համար, ըստ նրա, հայկական կողմը լիովին իրավունք ունի համանախագահող երկրներից` ԱՄՆ-ից, Ֆրանսիայից և Ռուսաստանից պահանջել անվտանգության վստահելի երաշխիքներ: «Այդպիսի երաշխիք կարող է լինել միջնորդ պետությունների կողմից Արցախի կոնսենսուսային ճանաչումը և դրա ներառումը միջազգային անվտանգության համակարգի մեջ: Միայն պատերազմի հեռանկարը փակելով` միջնորդները կարգավորման մյուս առանցքային խնդիրների համար կապահովեն անհրաժեշտ նվազագույն պայմաններ»,- ընդգծեց նա: