Եգիպտոսի գլխավոր դատախազ Աբդելմահիդ Մահմուդը, որը հինգշաբթի օրը նախագահ Մուհամմեդ Մուրսիի կողմից հեռացվել է պաշտոնից, հայտարարել է, որ հրաժարական չի ներկայացրել և կշարունակի կատարել իր պարտականությունները։ Այս մասին հայտնում են տեղի ԶԼՄ-ները,- փոխանցում է РИА Новости-ն:
Հինգշաբթի երեկոյան Եգիպտոսի նախագահի քարտուղարության ղեկավարը հայտնել է, որ պետության ղեկավարը Մահմուդին ազատել է գլխավոր դատախազի պաշտոնից և նշանակել Վատիկանում Եգիպտոսի դեսպան:
Ներկայումս գլխավոր դատախազության շենքում կոլեգիայի անդամները հավաքվում են արտահերթ նիստի: Կոլեգիայի անդամներից մեկի խոսքերով` նիստի ժամանակ «կքննարիկվի դատական իշխանության ներկայացուցիչների վերաբերմունքը Եգիպտոսի նախագահի հրահանգին»:
Ըստ օրենքի` երկրի գլխավոր դատախազին պաշտոնից ազատել հնարավոր է միայն նրա դիմումի հիման վրա և նրա համաձայնությամբ: