Ռուսական Независимая газета թերթը հոդված է հրապարակել ԱՄՆ փոխնախագահ Ջոզեֆ Բայդենի այցելության նախօրեին, որտեղ գնահատել է ռուս-ամերիկյան հարաբերությունները և դրանց հնարավոր ազդեցությունը ներռուսաստանյան զարգացումների վրա:
Մարտի 9-ին նախագահ Դմիտրի Մեդվեդևը Կրեմլում հանդիպելու է ԱՄՆ փոխնախագահ Ջոզեֆ Բայդենի հետ: Այս այցն աշխատանքային է: Սակայն որոշ ռուսաստանցի փորձագետներ կարծում են, որ նրա այցը յուրահատուկ աջակցության ժեստ է Մեդվեդևին 2012 թ. նախագահական ընտրություններից առաջ: Ըստ թերթի խորհրդարանական աղբյուրների՝ ԱՄՆ-ն դեռ 2007 թվից է աջակցություն հայտնել Մեդվեդևին, երբ Պուտինի ընտրությունը կանգ էր առել Սերգեյ Իվանովի վրա:
Նույն աղբյուրը կարծում է, որ Բայդենը նաև քննարկելու է Պուտինի աշխատանքային հետագա գործունեության հարցը` ընտրություններից հետո: Աղբյուրը նշել է, որ եթե վարչապետը չգնաց ընտրությունների, ապա նրան կառաջարկվի Միջազգային օլիմպիական կոմիտեի ղեկավարի պաշտոնը: Դիմադրության դեպքում էլ ներկայիս վարչապետի կողմնակիցներից մի քանիսին վիզա չեն տա ԱՄՆ, և դրանով հարցը կփակվի: Իսկ եթե դա էլ չօգնի` ուղղակի կսառեցվեն հաշվեհամարները բանկերում:
Սակայն Կարնեգի կենտրոնի մոսկովյան գրասենյակի գիտական խորհրդի անդամ Նիկոլայ Պետրովն այս սցենարին կասկածանքով է վերաբերվում: Այս լուրերը նա համարում է Մեդվեդևին աջակցող շրջանակների քարոզչության մի մասը: Նա առաջարկում է ուշադրություն դարձնել իրական ազդանշաններին, օրինակ` Խոդորկովսկու գործին: «Մեդվեդևը մի լավ բան էր ասում: Եվ ի՞նչ էր դրան հետևում: Խիմկիի անտառի հարցում Մեդվեդևը փորձում էր ցուցադրել լիբերալ դիրքորոշում, սակայն դրա վերջնական լուծումը նախագահի ջանքերի հետ ոչ մի կապ չուներ»,- նշել է Պետրովը: Ըստ փորձագետի` այս տանդեմը չի պահպանվի ընտրություններից հետո, քանի որ կարևոր է այլևս, թե ով է երկրի ղեկավարը: Անշուշտ, էլիտաների համար սա ձեռնտու վիճակ է, երբ կարելի է մանևրել, երբ կա երկու բևեռ, սակայն սա երկար չի կարող տևել:
Ռուսաստանի գիտությունների ակադեմիայի սոցիոլոգիայի ինստիտուտի էլիտաների ուսումնասիրության կենտրոնի ղեկավար Օլգա Կրիշտանովսկայան նշել է, որ ԱՄՆ-ն իրականում չի կարող թելադրել Ռուսաստանին, դրա համար լծակներ չունի: Այլ բան է, եթե էլիտան որոշի թեքվել դեպի նախագահ Մեդվեդևը, ապա այդ դեպքում առաջ կգա Պուտինին աշխատանքի տեղավորելու հարցը: «Օրինակ՝ Պուտինը կարող է դառնալ ՄԱԿ-ի հաջորդ ղեկավարը»,- ասել է Կրիշտանովսկայան:
