Վրաստանում Gallup հետազոտական կենտրոնի անցկացրած հարցման մասնակիցների 92 տոկոսը վստահ է, որ առավել բարեկամական հարաբերություններ իրենց երկիրը Միացյալ Նահանգների հետ է հաստատել: Հարցումն իրականացվել է ամերիկյան կառավարության պատվերով, սեպտեմբերի 27-ից մինչեւ հոկտեմբերի 7-ը 1500 հոգու շրջանում:
Ամերիկայից հետո դրական վերաբերմունքի առումով երկրորդ տեղում Վրաստանի համար Ադրբեջանն է, ապա հաջորդում են Ուկրաինան, Եվրամիությունը եւ Թուրքիան: Հայաստանը այդ ցուցակում տեղ չի գտել: Ամենավատ հարաբերությունները, հարցվածների 83 տոկոսի կարծիքով, Վրաստանն ունի Ռուսաստանի հետ: Վրաստանում ճնշող մեծամասնության վերաբերմունքն այդ երկրի նկատմամբ դրական չէ, սակայն միեւնույն ժամանակ հարցվածների 84 տոկոսն ափսոսում է Ռուսաստանի Դաշնության հետ լարված հարաբերություններ ունենալու համար:
Gallup հետազոտական կենտրոնը պարզել է նաեւ, թե ինչպես են Վրաստանի քաղաքացիները վերաբերում երկրում ընթացող քաղաքական գործընթացներին եւ ինչ կարծիք ունեն եվրոպական եւ եվրատլանտյան կառույցներին Վրաստանի ինտեգրման հարցում: Հարցման արդյունքների համաձայն` վրաստանցիների 74 տոկոսը դրական է վերաբերվում երկրի` ՆԱՏՕ- ի անդամ դառնալու ձգտումներին, իսկ 14 տոկոսը դա համարում է անհեռանկար եւ անիմաստ նախաձեռնություն: Եվրամիությանը անդամակցելուն կողմ է արտահայտվել հարցվածների 23 տոկոսը: Իսկ ինչ վերաբերում է երկրի ներքին կյանքին վրացիների վերաբերմունքին` Gallup հետազոտական կենտրոնի անցկացրած հարցումները ցույց են տալիս, որ Միխեիլ Սահակաշվիլիին 2013թ. իր նախագահական ժամկետի ավարտից հետո վարչապետի պաշտոնում կցանկանար տեսնել հարցվածների կեսից ավելին` 56 տոկոսը:
Հարցումը փաստում է, որ Վրաստանի քաղաքացիների մեծ մասը դժգոհ է երկրի տնտեսական վիճակից: Երկրի իշխանությունների ամենամեծ հաջողությունը հարցվածների 19 տոկոսը համարել է էներգահամակարգի վերականգնումը, 12 տոկոսը` ճանապարհների կառուցումն ու բարեկարգումը, 9 տոկոսը` կրիմինալ իրավիճակի բարելավումը, 7 տոկոսը` ենթակառուցվածքների կատարելագործումը, իսկ 6 տոկոսը` իրավապահ մարմինների եւ ոստիկանության ժամանակակից համակարգի ստեղծումը:
«Վերջին մեկ տարվա ընթացքում կաշառք տվե՞լ եք» հարցին հարցվածների 98 տոկոսը բացասական պատասխան է տվել: