Երոպայի խորհրդի տեղական և տարածքային իշխանությունների կոնգրեսի պատվիրակության անդամները, դիտարկելով սեպտեմբերի 9-ին և 23-ին ՀՀ-ում կայացած տեղական ինքնակառավարման մարմինների ընտրությունները, երեկ լրագրողների հետ հանդիպման ժամանակ հայտնեցին իրենց «զուսպ գոհունակությունը»` հայտարարելով, որ ընտրությունները խաղաղ են ընթացել, ակնհայտ կեղծիքներ էլ չեն նկատել: Այնուամենայնիվ, միջազգային` դիտորդների աչքից չեն վրիպել որոշ տեղամասերի մոտ տղամարդկանց կուտակումները, ինչի մասին նրանք զեկուցել են տարածքային կառավարման նախարար Արմեն Գևորգյանին, ով, սակայն, առանձնապես չի արձագանքել այդ փաստին: Ինչպես նաև դիտորդները նկատել են, որ տեղամասերում հաշմանդամների տեղաշարժման համար անհրաժեշտ պայմաններ չկան: Դիտորդական պատվիրակության նախագահ Հենրի Ֆերալը ընտրությունների կարևորագույն թերությունը համարեց քաղաքական կուսակցությունների թույլ մասնակցությունը` դա պայմանավորելով կուսակցությունների ֆինանսական միջոցների բացակայությամբ, ինչպես նաև սեփական թեկնածու չունենալու հանգամանքով: «Այնուամենայնիվ կարծում ենք, որ քաղաքական կուսակցություններն անհրաժեշտ կարևորություն չեն տալիս տեղական մակարդակում կառավարմանն ու ժողովրդավարությանը»,-հայտարարեց Հենրի Ֆերալը:
«Հրապարակ»-ը գրում է, որ դիտորդները տղամարդկանց կուտակումները նկատել էին, սակայն նախընտրական ծեծկռտուքների մասին տեղյակ չէին: Երբ լրագրողներից մեկը հետաքրքրվեց սեպտեմբերի 9-ին Արմավիրի մարզի Բամբակաշատ գյուղի միջադեպով, որին անմիջական մասնակից էր եղել ԱԺ պատգամավոր Ալիկ Պետրոսյանի (ՄԱՊ-ի Ալիկ) որդին` Մակար Պետրոսյանը, Ֆերալն ընդամենը ասաց, որ այդ մասին հաջորդ հանդիպման ժամանակ անպայման տեղյակ կպահի Արմեն Գևորգյանին: Բանից անտեղյակ Արմեն Գևորգյանն էլ, հավանաբար, մազը կտա կրակին և անմիջապես կպահանջի պատժել մեղավորներին: Միջազգային դիտորդների նման` ընտրախախտումների մասին աղաղակող, ցնցող զեկույցներ մեկ էլ հրապարակվեցին մայիսի 6-ի խորհրդարանական ընտրություններից հետո: Չգիտես ինչպես է պատահում, որ ընտրություններից առաջ և հետո հասարակությունը և տեղական մամուլը խոսում են բռնությունների, համատարած ընտրակաշառքների, ընտրախախտումների մասին, իսկ միջազգային դիտորդները վերջում հրապարակում են չեզոք, իշխանությունների սրտով մի զեկույց:
Կենտրոնական ընտրական հանձնաժողովի նախագահ Տիգրան Մուկուչյանը կիսում է դիտորդների գնահատականը: «Դատելով ստացված տեղեկատվությունից` կարելի է փաստել մի բան, որ ընտրական գործընթացն ընթացել է բնականոն հունով, Ընտրական օրենսգրքի պահանջներին համապատասխան: Ամեն ինչ անցել է խաղաղ մթնոլորտում, եթե անգամ եղել են առանձին դեպքեր, ապա դրանք կրել են լոկալ բնույթ և չէին կարող ստվերել ընտրական ողջ գործընթացը»,- «Հրապարակ»-ի հետ զրույցում ասաց Մուկուչյանը: Ըստ նրա, ԿԸՀ-ն կիրակի օրը կայացած ընտրությունների վերաբերյալ որևէ դիմում-բողոք չի ստացել, ընդամենը քվեարկության օրը մի քանի ահազանգ է եղել թանաքի և մի քանի այլ հարցերի հետ կապված, որոնք տեղում լուծում են ստացել: «ԿԸՀ-ն որևէ դիմում չի ստացել, իսկ ԸԸՀ-ներում հիմա ամփոփվում են վերահաշվարկի և այլ բնույթի դիմումներ, որոնց համապատասխանաբար ընթացք կտրվի»,- ավելացրեց ԿԸՀ նախագահը: Մուկուչյանը տեղյակ էր նաև Վայոց ձորի նախկին մարզպետի մասնակցությամբ դեպքին, որն անթույլատրելի որակեց: «Նա իր քրեաիրավական արժանի գնահատականը կստանա, իսկ ինչ վերաբերում է ընտրական գործընթացին, ընտրողների տված քվեներին, ապա հնարավոր է եղել դրանք հաշվարկել, և ընտրական պատկերը չի աղավաղվել»,-եզրափակեց Մուկուչյանը:
Թերթը հիշեցնում է, որ ընտրությունների օրը նախկին մարզպետ Սերգեյ Բագրատյանն իր որդու և համայնքի թեկնածուի հետ մտել էր տեղամաս, և փորձել էին քվեաթերթիկներ դուրս բերել, արդյունքում վերջիններս հարվածել էին իրենց խոչընդոտող ոստիկանին:
