«Մութ ամպեր` ԲՀԿ-ի նախկին նախարարների գլխին» հոդվածի հետ կապված դատախազության մամուլի խոսնակ Սոնա Տռուզյանը «Առաջին լրատվական»-ին ասաց. «Ես չեմ հաստատում, որ դատախազությունում նյութեր են նախապատրաստվում «Բարգավաճ Հայաստան» կուսակցության անդամ երկու նախկին նախարարների՝ առողջապահության և քաղաքաշինության նախարարներ Հարություն Քուշկյանի և Վարդան Վարդանյանի դեմ»:
Մեր թղթակցի այն հարցին, թե հնարավո՞ր է, որ քաղաքաշինության և առողջապահության և դեղերի ոլորտում հայտնաբերված խախտումնրի դեպքում մեղադրվեն նաև առողջապահության և քաղաքաշինության նախարարները, Տռուզյանը պատասխանեց. «Ես չեմ կարող եթեներով խոսել, այս դեպքում անգամ քրեական գործ չկա հարուցված»:
Հիշեցնենք, որ անցած շաբաթ նախագահ Սերժ Սարգսյանը կառավարությունում հրավիրած խորհրդակցության ժամանակ հանդես եկավ խիստ հայտարարություններով՝ քաղաքաշինության ոլորտում եղած «ատկատների» ու մրցույթներում իրենց ծանոթներին նախապատվություն տալու, ինչպես նաև դեղերի շուկայի մասին:
