Այսօր, սեպտեմբերի 17-ին, ժամը 10:00-ի սահմաններում Իջևանի բժշկական կենտրոնից ոստիկանության Իջևանի բաժին հայտնել են, որ աջ ազդրի կոտրվածք գանգուղեղային փակ տրավմա մարմնական վնասվածնքերով իրենց մոտ է տեղափոխվել Տավուշի մարզի Աչաջուր գյուղի բնակիչ 11-ամյա Սեյրան Մովսիսյանը:
Ֆոտոլրագրող Գագիկ Շամշյանը shamshyan.com-ին հայտնել է,որ հիվանդանոց մեկնած ոստիկանության Իջևանի բաժնի օպերատիվ քննչական խմբին փոխանցել են, որ վիրավորը հայտնել է, որ վնասվածքներն ստացել է Աչաջուր գյուղի «Հանդ» կոչվող արոտավայրում, տանձի ծառից վայր ընկնելու հետևանքով:
Սակայն հիվանդանոցում ոստիկաններին է մոտեցել Տավուշի մարզի Ազատամուտ գյուղի բնակիչ 30-ամյա Սարգիս Միրզոյանը և հայտնել, որ ինքը Աչաջուր-Իջևան ավտոճանապարհի 2-րդ կմ հատվածում, դեպի Իջևան ընթանալիս վարելով «Ռենջ Ռովեր» մակնիշի 70 QP 070 համարանիշի ավտոմեքենան, վրաերթի է ենթարկել 11-ամյա Ս. Մովսիսյանին, որին էլ իր ավտոմեքենայով տեղափոխել է Իջևանի բժշկական կենտրոն: Գ. Շամշյանը հայտնել է, որ Ս. Միրզոյանը աշխատում է «Սարգիս Միրզոյան» ԱՁ-ում, իսկ երեխան սովորում է Աչաջուրի միջնակարգ դպրոցի 4-րդ դասարանում:
Քիչ առաջ երեխային տեղափոխել են Երևանի Սուրբ Աստվածամայր բժշկական կենտրոն: Փաստի առթիվ ոստիկանության քննչական գլխավոր վարչության Տավուշի մարզի քննչական բաժնում նյութեր են նախապատրաստվում:
