Եվրախորհրդարանը հավանության է արժանացրել օրենքը, համաձայն որի՝ բոլոր կողմերը պարտավոր են Եվրահանձնաժողովի հետ համաձայնեցնել էներգետիկ ոլորտում իրենց միջպետական համաձայնագրերը: Այս մասին հայտնում է Europolitics-ը:
Գոյություն ունեցող բոլոր համաձայնագրերը նույնպես պետք է ներկայացվեն Եվրահանձնաժողովին, որը կստուգի դրանց համապատասխանությունը ԵՄ-ի մրցակցության մասին օրենսդրությանը: Հակասություններ հայտնաբերելու դեպքում պայմանագրում պետք է փոփոխություններ կատարվեն:
Արդյունքում պայմանագրերը կփոխանցվեն Բրյուսելին յուրաքանչյուր 3 տարին մեկ: Ընդ որում՝ միության ցանկացած պետություն կարող է խորհրդատվություն ստանալ Եվրամիությունից նոր համաձայնագրերի վերաբերյալ բանակցությունների ժամանակ:
«Վեդոմոստի»-ի փոխանցմամբ` վտանգի տակ կարող են հայտնվել Ռուսաստանի և ԵՄ երկրների գազային պայմանավորվածությունները: Առաջին հերթին դա վերաբերում է գազային մատակարարումների վերաբերյալ հին պայմանագրերին կամ «Հարավային հոսք» նախագծի շուրջ համաձայնագրերին: