Грузия Online-ի փոխանցմամբ՝ ամերիկացի ռազմական փորձագետների խումբը վաղը պաշտոնական այցով ժամանելու է Վրաստան: Դա տեղի է ունենում վրաց-ամերիկյան ռազմական համագործակցության համաձայնագրի շրջանակներում: Այս մասին հայտարարել է Վրաստանի պաշտպանության նախարարությունը:
Վերջինիս հաղորդմամբ՝ առաջին փուլում ամերիկացի փորձագետների խումբը հետազոտելու է Վրաստանի հակաօդային պաշտպանության (ՀՕՊ) վիճակը և կհստակեցնի Վրաստանի համար պոտենցիալ օդային սպառնալիքները: Փորձագետները վերլուծության կենթարկեն Վրաստանի ողջ տարածքի, այդ թվում նաև ջրատարածության ՀՕՊ ապահովման հնարավորություններն ու անհրաժեշտությունը:
Համագործակցության հաջորդ փուլում մշակվելու է Վրաստանի ՀՕՊ դոկտրինը, որն առաջարկվելու է վրացական կողմին. այն տեխնիկապես ապահովելու է ամերիկյան կողմը: Այդ աշխատանքները տարվում են այս տարվա փետրվարին Վաշինգտոնում ԱՄՆ-ի ու Վրաստանի նախագահներ Բարաք Օբամայի և Միխեիլ Սաակաշվիլիի կնքած համաձայնագրի շրջանակներում: Այն ժամանակ կողմերը պայմանավորվել էին ռազմական համագործակցության ոլորտում անցում կատարել նոր մակարդակի:
Փորձագետ Թոռնիկե Շարաշենիձեի խոսքերով՝ 2008 թվականի պատերազմում պարտություն կրելու պատճառ հանդիսացավ հենց թույլ ՀՕՊ ունենալը:
