Հերթական ապատեղեկատվության: «Հարսնաքարում» դաժան ծեծի հետևանքով մահացած Վահե Ավետյանի իրավահաջորդների ներկայացուցիչ, փաստաբան Տիգրան Եգորյանը այսպես է որակել Աժ պատգամավոր Ռուբեն Հայրապետյանի` օրերս «Նյուվել դ’Արմենի» պարբերականին տրված հարցազրույցում արված այն հայտարարությանը, թե, իբր, իր հեռախոսազանգերը ստուգվել են, ինչով հաստատվել է, որ ինքն Ավետյանի սպանության հետ որևէ կապ չունի, գրում է «Հայկական ժամանակ»-ը: Հարցազրույցում Հայրապետյանը ասել էր. «Կարող եմ ասել, որ իմ բոլոր հեռախոսազրույցներն ուսումնասիրվել են: Լևոնական պատգամավորները նույնիսկ պահանջեցին… Իմ հեռախոսազրույցների ուսումնասիրությունը չապացուցեց, թե ես տեղյակ եմ եղել»:
Փաստաբանը երեկ «ՀԺ»-ի թղթակցին ասել է, որ քրեական գործի նյութերում չկա որևէ փաստաթուղթ, որը կվկայեր Հայրապետյանի հեռախոսներն ու հեռախոսազրույցները ստուգելու մասին, մինչդեռ այդ գործողություններն անելու մասին փաստաբանները միջնորդել էին դեռևս նախաքննության ընթացքում. «Չկան հեռախոսագանգերը, չկան վերծանումները: Չկա որևէ տվյալ նախաքննական կողմից` Հայրապետյանի հեռախոսազանգերի վերծանումները պահանջելու մասին, նման միջնորդություն ներկայացնելու մասին, և չկա նաև տեղեկատվություն նման փաստերի տրամադրման մասին»: «ՀԺ» թղթակցի հարցին, թե ինչ միջնորդություններով են պատրաստվում հանդես գալ սեպտեմբերի 13-ից սկսվող դատավարության ընթացքում, Տիգրան Եգորյանը պատասխանել է. «Դատական քննության սկզբում մեր տակտիկական որոշակի հարցեր կցանկանայինք չբացահայտել, իհարկե` բազմաթիվ գործողություններ ունենք նախատեսած, բայց դրանց մասին դեռ չենք խոսի, կփորձենք անակնկալներ մատուցել»:
