Հայ ազգային կոնգրեսի համակարգող Լևոն Զուրաբյանը այսօր «Փաստարկ» ակումբում շեշտեց, որ ՀԱԿ-ը սկսում է հանրահավաքային շարք, ինչպես և հայտարարվել էր փետրվարի 18-ին. «Մեր նպատակն է այս բռնապետությանը պարտադրել արտահերթ ընտրություններ և կատարել շարժման պահանջները, և ես կարծում եմ, որ մարտը և ապրիլի սկիզբը այս առումով լինելու են իշխանությունների համար վերջին շանսը, որ նորմալ քաղաքական, բանական պրոցեսների սահմաններում մենք կարողանանք հասնել մեր նպատակներին:
Լ. Զուրաբյանը նշեց, որ նախորդ օրը Հարավային Կովկասում ԵՄ հատուկ ներկայացուցիչ Սեմնեբիի հետ հանդիպմանը Լևոն Տեր-Պետրոսյանը նկատել է, որ ցանկացած բռնապետություն ինքնին արդեն կոնֆլիկտ է։ Լ. Զուրաբյանը զարգացրեց այս գաղափարը. «Դա կոնֆլիկտ է ռեժիմի և ժողովրդի միջև և, ինչպես ցանկացած կոնֆլիկտ, հղի է պայթյունով ու անկանխատեսելի հետևանքներով: Ինչպես ցանկացած կոնֆլիկտում, կան կոնֆլիկտի լուծման խաղաղ ճանապարհներ` բանակցությունների միջոցով: Բայց նաև հայտնի է բոլորին, որ եթե կոնֆլիկտը երկար ժամանակ չի լուծվում խաղաղ բանակցություններով, ապա լուծվում է պատերազմով: Կարծես միջազգային հանրությունն այսօր հասկանում է, որ այնպիսի կոնֆլիկտը, որը էությամբ ներկայացնում է բռնապետությունը, խնդիր է ոչ միայն տվյալ ժողովրդի, այլ նաև միջազգային անվտանգության համար»:
ՀԱԿ համակարգողը շեշտեց, որ Մարտի 1-ը այս առումով լինելու է հնարավորություն` սկիզբ դնել այս կոնֆլիկտի լուծմանը. «Մենք գերադասում ենք, որ դա լինի խաղաղ բանակցությունների ճանապարհով»: