Երեկ Սերժ Սարգսյանի գլխավորությամբ ՀՀԿ գործկոմի նիստ է տեղի ունեցել, որի ընթացքում, ինչպես հավաստիացրել է ՀՀԿ խոսնակ Էդուարդ Շարմազանովը, քննարկվել են ներկուսակցական հարցեր, արտաքին քաղաքական հարցեր, ու նաև ՏԻՄ ընտրությունների հետ կապված հարցեր:
Դրանից մի քանի ժամ առաջ Սերժ Սարգսյանն ընդունել էր ՆԱՏՕ –ի գլխավոր քարտուղար Անդերս ֆոգ Ռասմուսենին, որը տարածաշրջանային այցով ժամանել էր Երևան: Դժվար է ասել, թե ինչ պատճառահետևանքային կապ կա այս երկու իրադարձությունների միջև և արդյո՞ք ՀՀԿ գործկոմի նիստը հենց գիտակցաբար է նշանակվել ՆԱՏՕ-ի գլխավոր քարտուղարի այցից հետո: Ի վերջո, Ռասմուսենը սաֆարովյան այս պատմության մեջ առաջին բարձրաստիճան պաշտոնյան է, որի հետ հանդիպում է Սերժ Սարգսյանը:
Կասկած չկա, որ բացի հրապարակային-արարողակարգային պաշտոնական հայտարարություններից ու հաղորդագրություններից, Ռասմուսենն ու Սերժ Սարգսյանը մանրամասն քննարկել են ստեղծված իրավիճակը և այդ քննարկման բուն, առարկայական բովանդակությունը անկասկած չի հասել հանրությանը: Դժվար է ասել նաև, թե այդ բովանդակությունը ինչ ազդեցություն է ունեցել ՀՀԿ գործկոմի նիստի վրա, դրա բովանդակության վրա, սակայն նաև նկատելի էր, որ նիստից հետո մասնակիցներից շատերի դեմքերը բավական մտահոգ էին, հոգնած:
Մինչդեռ, սովորաբար ՀՀԿ-ականները նման նիստերից հետո բաժանվում էին բավական թեթև և նույնիսկ անհոգ տեսքով: Ըստ ամենայնի իրավիճակը բավական լուրջ է և իշխանությանը հարկ է լինելու կայացնել բավական ճակատագրական որոշումներ: Թե հատկապես ինչ ժամանակահատվածում Հայաստանի իշխանությունները պետք է կատարեն այն քայլերը, որոնք էլ երևի թե հենց մտահոգել են ՀՀԿ-ականներին և գործկոմի նիստի ընթացքում հոգնեցրել նրանց, նույնպես դժվար է կանխատեսել, սակայն հոգնած ՀՀԿ-ականների դեմքերը երևի թե ամեն ինչ ասում են ու շատ խոսուն են, ու այստեղ արդեն ժամկետները դառնում են որոշակիորեն անէական, առավել ևս, որ ըստ երևույթին երկար սպասելու հարկ չի լինելու, քանի որ իրադարձությունները վերջին շրջանում շատ դինամիկ ու արագ են զարգանում: Մնում է միայն սպասել ու տեսնել, թե ում «սիրտն է խառնելու» այդ արագությունից:
