Ասիախաղաղօվկիանոսյան տնտեսական համագործակցության գագաթնաժողովի նախօրեին Ռուսասաստանի նախագահ Վլադիմիր Պուտինը այցելել է Յամալ, որտեղ մասնակցել է «Հույսի թռիչք» նախագծին՝ ուղղված սպիտակ կռունկների պահպանմանը:
Ինչպես հաղորդում է «Վզգլյադ»-ը, Պուտինը մասնակցել է գիտահետազոտական խմբի փորձերից մեկին, որի նպատակը եղել է բուծարանի կռունկներին ցույց տալ իրենց թռիչքի ուղղությունը: Այսպիսով՝ դելտապլանով, որը կռունկներն ընդունում են որպես իրենց առաջնորդ, Պուտինը երեք թռիչք է իրականացրել՝ մեկը ճանաչողական, երկուսը՝ թռչունների հետ:
Առաջին անգամ Պուտինի թռիչքի ուղղությանը հետևել է միայն մեկ կռունկ: Ավելի ուշ լրագրողների հետ զրույցում նախագահը բացատրել է, որ թռիչքի ժամանակ ուժեղ քամի է եղել, իսկ դելտապլանի արագությունը շատ մեծ է եղել, ուստի թռչունները չեն կարողացել կողմնորոշվել:
Երկրորդ թռիչքը բարեհաջող է ավարտվել. այս անգամ թռչող Պուտինին հետևել է 5 կռունկ, չնայած մի քանի շրջանից հետո մնացել են միայն երկուսը:
Պուտինը նշել է, որ գոհ է փորձի արդյունքից. «Թեթևացած եմ զգում, որ ամեն ինչ հաջողվեց»,- ասել է նա՝ ավելացնելով, որ դա մեծ ադրենալին է տալիս, և խորհուրդ տալով ցանկացողներին փորձել: