«Ժառանգության» նախաձեռնության նպատակն է ուսումնասիրել երկրում ստեղծված ամենաթողությունը, որը հաստատվել է Պողոս Պողոսյանի սպանությամբ: Այսօր լրագրողների հետ հանդիպմանը այս մասին ասաց «Ժառանգություն» խմբակցության պատգամավոր Զարուհի Փոստանջյանը՝ անդրադառնալով երեկ ԱԺ-ում «Ժառանգություն» խմբակցության կողմից շրջանառության մեջ դրված նախաձեռնությանը՝ ԱԺ-ում ժամանակավոր հանձնաժողով ստեղծելու վերաբերյալ:
Պատգամավորը նկատեց, որ նախաձեռնությունը միտված է երկրում տիրող անպատժելիության մթնոլորտին, դատական և գործադիր իշխանության անգործությանը, որին ՀՀ Սահմանադրությամբ հնարավոր է հակակշռել միայն ժամանակավոր հանձնաժողովների գործունեությամբ:
Զարուհի Փոստանջյանի խոսքով՝ ՀՀ-ում անպատժելիության մթնոլորտը հաստատվել է 2001 թվականին, երբ մեր պետության թիվ մեկ պաշտոնյայի թիկնազորի ներկայացուցչի կողմից սպանվեց Պողոս Պողոսյանը, իսկ մեղավորը ձևական պատիժ ստացավ` նույնիսկ մեկ օր բանտում չգտնվելով:
«Ժամանակավոր հանձնաժողովի ուսումնասիրությունները դրան են վերաբերելու, նաև գործող և պաշտոնաթող պաշտոնյաների մասնակցությամբ իրականացված դեպքերին»,- պարզաբանեց պատգամավորը:
Խոսելով «Ժառանգության» մյուս նախաձեռնությունների մասին՝ նա ասաց, որ արդեն երկրորդ անգամ հինգերորդ գումարման ԱԺ է ներկայացվել օրենքի նախագիծ՝ Օսմանյան կայսրությունում հույների ցեղասպանության վերաբերյալ, որին կառավարությունն իր բացասական եզրակացությունն է տվել:
«Ցավում եմ, որ անկախ ՀՀ կառավարությունը հարիր որոշումներ չի կայացնում: Կառավարությունն այս օրինագծի վերաբերյալ արդեն երկրորդ անգամ նման վարքագիծ է դրսևորում»,- նկատեց Զարուհի Փոստանջյանը:
Նա նաև տեղեկացրեց, որ «Ժառանգության» հաջորդ նախաձեռնությունը ԱԺ-ում հակակոռուպցիոն ժամանակավոր հանձնաժողով ստեղծելն է, որը պետք է քննի հատուկ հարցեր՝ սեփականաշնորհման, բնապահպանական և մի քանի թիրախային ոլորտների խնդիրների վերաբերյալ: Ըստ պատգամավորի՝ սրա վերաբերյալ քննարկումները կշարունակվեն ԱԺ-ում:
«Ժառանգություն» խմբակցության պատգամավոր Զարուհի Փոստանջյանը կարևորեց նաև իրենց խմբակցության նախաձեռնությունը՝ ՀՀ քաղաքացիների ընտրելու իրավունքի վերաբերյալ:
«Արտերկրում գտնվող մեր հայրենակիցները պետք է ընտրելու հնարավորություն ունենան, որի վերաբերյալ դիմել ենք նաև ՄԻՊ-ին, որպեսզի նա դիմի ՍԴ և վիճարկի այն դրույթը, որով արգելվում է արտասահմանում գտնվող ՀՀ քաղաքացիների՝ համապետական ընտրություններին մասնակցելը: Հրապարակելու ենք մի հանրային իրազեկում, թե ինչ կարգով նրանք կարող են վիճարկել և ՍԴ-ում իրենց իրավունքը օրենքով պաշտպանել և 2013 թվականի ընտրություններին քվեարկել: Չի բացառվում, որ ստորագրահավաք սկսենք ԱԺ-ում, ենթադրվում է 28 պատգամավորի ստորագրություն»,- մանրամասնեց Զարուհի Փոստանջյանը:
Անդրադառնալով այս օրերին քննարկման ենթակա թիվ մեկ թեմային՝ Ախթալայում ծավալվող իրադարձություններին, նա նկատեց, որ այս պահի դրությամբ այն բոլոր թեկնածուները, որոնք առաջադրվել էին որպես քաղաքապետի թեկնածու, չեն հասել կոնսենսուսի, որով պետք է հանդես գային:
«Եթե կոնսենսուս չլինի, բռնություններն էլ չեն բացառվում: Այս պահի դրությամբ այնտեղ չեն անցկացվելու քաղաքապետի ընտրություններ, չենք կարող այս պահին այդ մասին խոսել: Չենք ունենալու ընտրովի քաղաքապետ»,- ասաց պատգամավորը:
