Բարաք Օբաման Բաշար Ասադի հակառակորդների հետ համագործակցության գաղտնի փաստաթուղթ է ստորագրել, գրում է «Կոմերսանտ»-ը:
ԱՄՆ նախագահ Բարաք Օբաման ԿՀՎ-ին և մյուս գերատեսչություններին թույլատրել է Սիրիայում օգնել Բաշար Ասադի հակառակորդներին: Սակայն Վաշինգտոնը բացեիբաց չի հայտարարել այդ մասին: Սպիտակ տան ղեկավարի՝ «հետախուզական կողմնորոշումներ» անվանումը ստացած հրահանգը փորձել են գաղտնի պահել, սակայն մամուլին հայտնի է դարձել փաստաթղթի մասին: Խոսքն առաջին հերթին գնում է սիրիական ընդդիմությանը հետախուզական տեղեկատվություն տրամադրելու մասին: Ինչ վերաբերում է ռազմական օգնությանը, դրա տրամադրումը ԱՄՆ-ի լուռ համաձայնությամբ համակարգում է Թուրքիան: Եվ ոչ առանց հաջողության:
Բարաք Օբամայի հրահանգը նախատեսում է Վաշինգտոնի համագործակցությունը սիրիական ընդդիմությանը արտասահմանյան օգնություն համակարգող հրամանների գաղտնի կենտրոնի հետ: Այն գտնվում է Թուրքիայի և իսլամական աշխահի այլ երկրների՝ Սաուդյան Արաբիայի և Քաթարի կառավարման ներքո: Կենտրոնը տեղակայված է Թուրքիայի Ադանա քաղաքում՝ ամերիկյան Ինջիրլիք ռազմաօդային բազայից ոչ այնքան հեռու:
Սպիտակ տան ներկայացուցիչները ոʼչ հերքել, ոʼչ հաստատել են Բարաք Օբամայի գաղտնի շրջանառությունների մասին տեղեկատվությունը: Դրա փոխարեն ԱՄՆ ֆինանսների նախարարությունը խոտովանել է, որ Սիրիայի ազատ բանակի վաշինգտոնյան ներկայացուցչությանը թույլատրել է ընդդիմության անունից բանկային գործողություններ կատարել: