Ըդդիմադիր Հայ ազգային կոնգրեսը չի մեղադրելու կամ դատապարտելու ոչ իշխանական որևէ ուժի և ձեռնպահ է մեկնաբանել նրանց դիրքորոշումները, «Ազատություն» ռադիոկայանի հետ զրույցում հայտարարել էԿոնգրեսի խորհրդարանական խմբակցության ղեկավար Լևոն Զուրաբյանը՝ պատասխանելով հարցին, թե ինչպե՞ս է բացատրում «Հարսնաքար»-ի գործով տարբեր խորհրդարանական նախաձեռնություններից հրաժարվելու՝ «Բարգավաճ Հայաստան» կուսակցության կեցվածքը:
Հիշեցնենք, ԲՀԿ-ն վերջին պահին հրաժարվեց ստորագրել Գլխավոր դատախազությանն ու Կառավարությանը հասցեագրված հարցաշարի տակ՝ պատճառաբանելով նախաձեռնությանը «Ժառանգություն» խմբակցության մասնակցությունը: Եվ չնայած կոալիցիայի մաս կազմելուց հրաժարված այս խմբակցությունը պատրաստակամություն հայտնեց «Հարսնաքար»-ի գործով այլ նախաձեռնություններ քննարկել ՀԱԿ-ի և Դաշնակցության հետ, կամ հանդես գալ սեփական հարցաշարով, միայն թե, ԲՀԿ-ականների բնորոշմամբ՝ «այլ տեղերից կառավարվող» «Ժառանգությունը» չմասնակցի գործընթացին, այնուամենայնիվ այսօր տեղեկացանք, որ ԲՀԿ-ն դեռ սեփական նախաձեռնությամբ հանդես չի եկել:
Ավելի վաղ տապալվել էր «Հարսնաքար»-ի հարցով Ազգային ժողովի արտահերթ նիստ հրավիրելու նպատակով ստորագրահավաքը. ԲՀԿ-ի 37 պատգամավորներից նախաձեռնությանը միացել էին 7-ը։
Հայ ազգային կոնգրեսի համակարգող Լևոն Զուրաբյանը, այնուհանդերձ, չի համարում, որ խորհրդարանում ոչ կոալիցիոն ուժերի համագործակցությունը արդեն իսկ վտանգված է։ Նա նպատակահարմար չգտավ մեկնաբանել, թե արդյոք արժանահավատ են «Ժառանգության» մասնակցության պատրվակով խորհրդարանականների նախաձեռնություններից հրաժարվելու՝ ԲՀԿ-ի հիմնավորումները՝ ասելով․ – «Մենք չենք դատապարտելու որևէ քաղաքական ուժի, մենք որևէ քաղաքական ուժի ինչ-որ բան չենք պարտադրելու կամ փորձելու ինչ-որ դիվիդենտներ քաղել։ Նման մոտեցումները ուղղակի վնասակար են: Մենք կարծում ենք, որ բոլորի մոտեցումը հետևյալը պետք է լինի․ եթե կան նախաձեռնություններ, որոնց շուրջ կարող ենք միավորվել, ուրեմն՝ միավորվում ենք և համատեղ ենք գործում։ Եթե ինչ-ինչ պատճառներով ինչ-որ քաղաքական ուժ չի կարողանում միանալ այդ նախաձեռնությանը, մենք նրան չպիտի պախարակենք, չպիտի մեղադրենք: Ավելին՝ շատ հնարավոր է, որ քաղաքական ուժերը նաև միակողմանի նախաձեռնություններով հանդես գան, և նորից մենք չպիտի կշտամբենք իրար, որ մեկը մյուսին չմիացավ, կամ մեկի գործողությունների պատճառով տապալվեց մյուսի նախաձեռնությունը: Սա անվերջ և դեստրուկտիվ բանավեճ է դառնալու, որևէ նպաստ չի բերելու մեր ընդհանուր գործին»։
«Մենք ոչ թե փորձում ենք խուսափել ճշգրիտ գնահատականներ տալուց, այլ առողջ քաղաքական ուժերին միավորելու ռազմավարություն ենք որդեգրել, որը հնարավորություն կտա փոխել քաղաքական մթնոլորտը Հայաստանում», – ասել է Լևոն Զուրաբյանը, ընդգծելով, որ իրենց խնդիրն է ապահովել «հնարավորինս շատ պատգամավորների և քաղաքական ուժերի ընդգրկվածություն՝ ընդդիմության միասնական նախաձեռնություններում»:
Փորձեցինք ճշտել՝ իսկ եթե շարունակվեն ԲՀԿ-«Ժառանգություն» հակասությունները, արդյո՞ք Կոնգրեսը ԲՀԿ-ի կողմը կանցնի, հաշվի առնելով, որ ԲՀԿ-ն իր մեծությամբ երկրորդ խմբակցությունն է խորհրդարանում և միայն ԲՀԿ-ի շնորհիվ է հնարավոր ապահովել «հնարավորինս շատ պատգամավորների մասնակցություն»։ Զուրաբյանն արձագանքել է․ – «Մենք առավելագույնը կանենք, որ նման ընտրության առջև կանգնած չլինենք: Բնականաբար, հաշվի առնելով, որ «Բարգավաճ Հայաստան» կուսակցությունը առավելագույն մանդատներ ունի, շատ կարևորում ենք տարբեր հարցերի շուրջ համագործակցության կառուցումը ԲՀԿ խմբակցության հետ: Բայց դա չի նշանակում, որ մենք բացառելու ենք մեր համագործակցությունը այլ քաղաքական ուժերի հետ: Եթե առողջ նախաձեռնություն է, պատրաստ ենք բոլորի հետ խոսել: Թե ինչպես ենք գործելու՝ դա արդեն տակտիկայի հարց է, դա էլ թողեք մեզ, մենք ճիշտ ձևը կգտնենք»:
ՀԱԿ խմբակցության ղեկավարը համոզմունք է հայտնել, որ խորհրդարանում և հանրահավաքային պայքարում Կոնգրեսի «ճիշտ քաղաքականությունը հնարավորություն կտա լայնացնել իշխանությունների դեմ ոչ իշխանական ուժերի միասնական ճակատը»։
Հարցին՝ իսկ որքանո՞վ է Լևոն Զուրաբյանը հնարավոր համարում նախագահական ընտրություններում միասնական թեկնածուով հանդես գալու հեռանկարը։
«Ոչ թե մեզ պետք է միասնական թեկնածու, այլ մեզ պետք է հզոր թեկնածու: Թեկնածուի հզորությունը դա արդեն ֆակտոր է, որը թույլ է տալիս մարտահրավեր նետել Սերժ Սարգսյանին, որը թույլ է տալիս համախմբել քաղաքական ուժերին: Հզոր թեկնածուն ավտոմատ դառնում է միասնական թեկնածու: Եվ այստեղ կարևոր էլ չէ, որ ստանա բոլորի աջակցությունը», – ասել է ՀԱԿ խորհրդարանական խմբակցության ղեկավարը։
Այն դիտարկմանը, թե՝ «Գագիկ Ծառուկյանին Ձեր ասած «հզոր» թեկնածուն համարո՞ւմ եք», Լևոն Զուրաբյանը պատասխանել է. – «Նպատակահարմար չեմ համարում որևէ կերպ պատասխանել այդ հարցին»:
Հարցին՝ իսկ Լևոն Տեր-Պետրոսյանը կառաջադրվի՞, Զուրաբյանը պատասխանել է․ – «Տեր-Պետրոսյանն այն գործիչն է, որը իր առաջադրման մասին որոշումը կընդունի միայն քաղաքական իրավիճակի և ռեսուրսների, նաև՝ հակառակորդների ռեսուրսների մանրակրկիտ վերլուծությունից հետո»:
