Հայի կողմից թուրքի սպանությունը մեծ անհանգստություն է առաջացրել հայ համայնքի շրջանում: Այս մասին «Առաջին լրատվական»-ի հետ զրույցում ասաց Ստամբուլում լույս տեսնող «Մարմարա» օրաթերթից Մաքրուհի Հակոբյանը` անդրադառնալով գիշերը տեղի ունեցած սպանությանը: Ըստ նրա` մեծ արձագանքներ կան դեպքի առնչությամբ, քանի որ հայաստանցի Գրիգոր Իշխանյանը ձերբակալված է, իսկ նման սպանություններ հայերի կողմից ամեն օր չէ, որ իրականացվում են: Մաքրուհի Հակոբյանի խոսքով` այսօր բոլոր թերթերի առաջնորդողներում եղել են այս մասին նյութեր:
Մաքրուհի Հակոբյանը պատմեց, որ Ստամբուլի Ֆաթիհ թաղամասը` Գումգափուն, հայտնի է նրանով, որ հայաստանցիները կենտրոնացած բնակվում են այստեղ: Ըստ Մ. Հակոբյանի` այստեղ թուրք 49-ամյա Ջեմալ Թեզելից բնակարան էր վարձակալում ՀՀ քաղաքացի 33-ամյա Գրիգոր Իշխանյանը, ով այդ տանը բնակվում էր իր 20-ամյա ընկերուհուʽ Սեդու Բեգինյայի հետ: «Գրիգոր Իշխանյանը դաշույնով սպանել է թուրքին, երբ իմացել է, որ ընկերուհու նկատմամբ սեռական ոտնձգություն է իրականացրել: Սկզբից պահանջել է բացատրել, թե ինչու է նման բան արել, խոսակցությունն ավարտվել է սպանությամբ»,- մանրամասնեց Մ. Հակոբյանը` հավելելով, որ այս պահին Գրիգոր Իշխանյանը ձերբակալված է, քանի որ հարևանները դեպքի մասին անմիջապես ահազանգել են իրավապահ մարմիններին: Մաքրուհի Հակոբյանը նշեց, որ «Մարմարա»-ն սեփական հետաքննությունը դեռևս չի անցկացրել, դեպքի մասին էլ իմացել են թուրքական լրատվամիջոցներից:
Նկատենք նաև, որ թուրքական Hürriyet թերթը գրել էր, որ Գրիգոր Իշխանյանը տունը վարձակալել էր իր ընկերուհու հետ և սպանել թուրքին իր ընկերուհու նկատմամբ սեռական ոտնձգություն իրականացնելու համար:
