Տրանսպորտի և կապի նախարարությունից երեկ հաստատել են, որ իրենք լայնածավալ ուսումնասիրություններ են սկսել ԲՀԿ նախագահ Գագիկ Ծառուկյանի սանիկ Արթուր Հարությունյանի (Պալաչ) դիմումի հիման վրա:
Նախարարության տրանսպորտի վարչության պետի պաշտոնակատար Դավիթ Մելքոնյանը «ՀԺ»-ին հայտնել է, որ իրենք նաև վարչապետից են հանձնարարական ստացել՝ ուսումնասիրել գործը: «Ուսումնասիրությունները շարունակվում են, մենք մի քանի տարբեր տիպի պարզաբանումներ ենք ստացել տարբեր ատյաններից և ուսումնասիրությունների ավարտից հետո նախարարությունը անպայման հանդես կգա հայտարարությամբ»,- ասել է Դավիթ Մելքոնյանը:
«Ինչպես տեղեկացրել էինք, Արթուր Հարությունյանը դիմել էր տարբեր ատյաններ, այդ թվում նաեև Սերժ Սարգսյանին, վարչապետին, տնտեսական մրցակցության հանձնաժողովին` պահանջելով պարզել, թե ինչու է Ծառուկյանը միայն իր ընկերության մրցույթով շահած երթուղիների գծերին զուգահեռ բարեգործական երթուղի բացել, այլ ոչ` իր փեսայի և մյուս մերձավորների: Սնանկացման եզրին կանգնած Արթուր Հարությունյանի «Քինգ դե լյուքս» ընկերության վարորդները, որ նախորդ շաբաթ սկսած անժամկետ գործադուլը դադարեցրել էին, սպառնում էին, որ երեկ պետք է փակեին Աբովյան-Երևան մայրուղին: Ճանապարհը, սակայն, երեկ չփակվեց. «Քինգ դե լյուքսում» սպասում են պատկան մարմինների պատասխանին: Բայց մինչ վարորդները սպասում են, Ծառուկյանը երեկվանից բարեգործական ավտոբուսներ է ներմուծել նաև իր սանիկի Չարենցավան-Երևան մրցույթով շահած երթուղի:
Իսկ Պալաչը շարունակում է Հայաստանից տարհանել իր մերձավորներին, ինչը երեկ հաստատվեց նաև պաշտոնապես»:
«ՀԺ»-ի հարցերին պատասխանել Է «Քինգ դե լյուքսի» տնօրեն Արթուր Դալլաքյանը:
-Պարոն Դալլաքյան, նախատեսված էր, որ այսօր գործադուլը վերսկսվելու է, և վարորդները փակելու են մայրուղին, ինչ-որ բան է փոխվե՞լ:
-Ես արգելեցի, որ դուրս գան գործադուլի: Վարձատրեցի, վառելիք տվեցի, որ աշխատեն: Իրենց մտադրությունը` ճանապարհ փակել, նշանակում է` պարալիզացնել ամբողջ ճանապարհը, բայց մարդ ես, կարող է շտապօգնություն աշխատի և այլն, նման տիպի ակցիա ես թույլ չեմ տա:
-Իսկ գործադո՞ւլը:
-Գործադուլը կանեն, բայց ճանապարհ փակելը ես կարգելեմ:
-Ե՞րբ են պատրաստվում գործադուլ անել:
-Առաջիկա օրերին երևի՝ դժվար, որովհետև ես իմ հաշվին մի շաբաթվա աշխատավարձ ու վառելիք եմ տրամադրել, մինչև հասկանամ` ինչ է կատարվում պետական մարմիններում:
-Ասում են, Չարենցավանի գծի վրա էլ են նոր բարեգործական ավտոբուսներ հայտնվել, այդպե՞ս է:
-Այսօր 6-7 հատ ավելացրել է, էլի:
-Իսկ ի՞նչ եք անելու:
-Չգիտեմ, հիմա այն վիճակն է, որ համարյա փակվում են երթուղիները, արդեն ոչ մի մարդ չի նստում մեր ավտոբուսները:
-Պաշտոնական պատասխան ոչ մի կառույցից դեռ չե՞ք ստացել:
-Դեռ չկա, ես ուղղակի չեմ հասկանում, թե ինչու: Երևի երկուշաբթի ստանամ, ի վերջո, սա երկար չի կարող ձգվի, պետական նշանակություն ունեցող երթուղիները փակվեն, ու անօրինական երթուղիները աշխատե՞ն: Դա նորմալ երևո՞ւյթ է, նորմալ երևույթ չէ:
-Արթուր Հարությունյանի հետ խոսե՞լ եք, ի՞նչ է ասում:
-Դեռ չէ, կապ չկա նրա հետ, դեռ չի վերադարձել:
-Մենք տեղեկություններ ունենք, որ դրսի հեղինակություններին է դիմել այդ հարցերը լուծելու համար:
-Ես չեմ ուզենա այդ հարցին պատասխանել, թե ինքը ինչ է մտածում կամ ինչ է որոշել, բայց այսօր կոնկրետ գործի վերաբերյալ որոշումն այսպիսին է, որ եթե այսպես շարունակվում է, երթուղիներն արդեն ավտոմատ կկանգնեն: Կստացվի, որ 40 տարվա ՊԱԶ-երը կարողացան 2-3 տարեկան ավտոբուսներին շուկայից դուրս հանել:
-Խոսակցություններ կան, թե Ծառուկյանն ասել է, որ ոչնչացնելու է Պալաչին:
-(Ծիծաղում է): Ո՞նց կարան ոչնչացնեն: Ես կասեմ՝ բիզնեսն է ոչնչացնում, բայց մարդը հո խաղալիք չի՞, որ ոչնչացնի: Ես չգիտեմ՝ ոնց կլինի, բայց բոլորս գիտենք՝ ամեն մարդ իր սխալների համար մի օր պատասխան տալիս է տալիս:
-Ճի՞շտ է, որ Արթուր Հարությռնյանը, բացի իր ընտանիքից, մյուս մերձավորներին էլ է երկրից հանել:
-Կա նման բան: Մերձավորների ընտանիքներին են դուրս հանել:
-Ի՞նչ է դա նշանակում:
-Ես չեմ պատասխանի դրան: Մի մարդ մի քայլ է անում, մի մարդ մտածում է՝ իր հաջորդ քայլը ոնց անի: Բայց մենք դեռ մինչև հիմա հուսով ենք, որ պետությունում ի վերջո այս ամեն ինչին վերջ կտրվի, չի կարող այս ամենը երկար շարունակվի: Ինքը վտանգավոր կդառնա: Բայց մենք այսօր դիմել ենք պետական մարմիններին, մենք այսօր հավատում ենք դեռ, որ մեր հարցը լուծում կստանա:
-Իսկ եթե չստանա՞:
-Դե, արդեն Աստված գիտի՝ ինչ տեղի կունենա:
-Ի՞նչ կարող է տեղի ունենալ:
-Ես չեմ կարող ասել՝ ինչ տեղի կունենա: Ամեն մարդ պիտի հասկանա, որ չի կարելի մեկ ուրիշի հաշվին ինչ-որ լավ բաներ անել, բարի գործեր անել:
-Մեր տեղեկություններով` ձեր վարորդները հիմա էլ որոշել են, որ երկուշաբթի են գործադուլ սկսելու:
-Այո, կար նման նպատակ, բայց երեկ երեկոյան այդ ամենը ես կանգնեցրել եմ, որովհետև ես վստահ եմ, որ պետք է ուշ թե շուտ հարցի լուծում լինի:
Տրանսպորտի և կապի նախարարության տրանսպորտի վարչության պետը երեկ կարծիք հայտնեց, որ գործադուլ չի լինի. «Մենք աշխատում ենք երկու կողմի հետ էլ, հասկանում ենք շատ լավ խնդիրը և անպայման կփորձենք ճիշտ, արդյունավետ լուծում առաջարկել»: Հարցին՝ ե՞րբ կավարտվեն ուսումնասիրությունները, նա պատասխանեց. «Չեմ կարող ասել, դրանք շատ ծավալուն են»»,- հավելում է «ՀԺ»-ն:
