Հայաստանի համապատասխան մարմինները տեղյակ չեն, թե ինչ ընկերություններ են շահագործում մեր երկրի հանքերը՝ օֆշորայի՞ն, թե՞ նորմալ երկրում նորմալ գրանցում ունեցող: Ինչպես «Առաջին լրատվական»-ի՝ «ընդերքօգտագործման ոլորտում քանի՞ օֆշորային ընկերություն է գործում և ընդհանուրի ո՞ր մասն են կազմում» հարցադրմանն ի պատասխան հայտնեցին ՀՀ էներգետիկայի և բնական պաշարների նախարարությունից, ՀՀ օրենսդրության համաձայն՝ ընդերքօգտագործման իրավունք հայցելու դիմումին կից ներկայացվում է իրավաբանական անձի պետական գրանցման վկայականի պատճենը, որտեղ չի նշվում՝ այն օֆշորային ընկերություն է, թե` ոչ: Ըստ այդմ՝ հայտնի չէ նաև, թե ինչիպիսի դինամիկա կա, և դրանց թիվը որքան է ավելանում մեր երկրում:
Գերատեսչությունից տեղեկացրեցին, որ նախարարության ընդերքի տրամադրման գործակալության կողմից վարվող ընդերքօգտագործման իրավունքների հաշվառման մատյանի համաձայն՝ 2011-2012 թվականների ընթացքում տրամադրվել է հանքարդյունահանման (հատուկ) 46 լիցենզիա, որոնցից՝ հրաբխային խարամի՝ 1, ոսկու՝ 1, կալիումական ռիոլիտ-դացիտային տուֆի՝ 1, կրաքարի, մարմարացված կրաքարի՝ 3, ավազի, կոպճային ավազի և ավազակոպճային խառնուրդի՝ 11, պղնձի, պղինձ-մոլիբդենի՝ 3, տուֆի, դացիտային, պեմզային ֆելզիտային տուֆերի՝ 5, գաբրոյի՝ 2, գիպսատար ապար և բազալտի, բազալտի, անդեզիտա-բազալտի,անդեզիտի՝ 13, լիթոիդային պեմզայի՝ 1, բազալտ և քվարցային դիորիտի, քվարցիտի՝ 2, գիպսատար կավ և ավազի, գիպսաքարի՝ 2, տրավերտին և կավի՝ 1:
Նոր շահագործվող այս հանքերի ընդհանուր մակերեսը կազմել է 384.28 հա:
