Քուվեյթի Սահմանադրական դատարանը հունիսի 20-ին անօրինական է համարել ընթացիկ տարվա փետրվարին արտահերթ ընտրությունների արդյունքում ձևավորված խորհրդարանի կազմը:
Ինչպես հաղորդում է Reuters-ը, դատարանի որոշման մեջ ասվում է, որ երկրի էմիր Սաբահ Ալ- Ահմադ ալ- Սաբահի կողմից արտահերթ ընտրություններ անցկացնելու որոշումը հասկասում է սահմանադրությանը, հետևաբար համարվում է անօրինական, ինչպես որ անօրինական են դրան հաջորդած ընտրությունները:
Միաժամանակ Քուվեյթի Սահմանադրական դատարանը հայտարարել է, որ աշխատանքի պետք է վերադառնան 2011թ. ցրված խորհրդարանի նախկին կազմի պատգամավորները:
Հունսիի 18-ին էմիրն արդեն մեկ ամսով դադարեցրել էր խորհրդարանի նոր կազմի աշխատանքները: Պատգամավորները, որոնց մեծամասնությունը ընդդիմության ներկայացուցիչներ են, պարբերաբար հակակոռուպցիոն հետաքննություններ էին անցկացնում կառավարության անդամների նկատմամբ՝ ոչ շահավետ իրավիճակ ստեղծելով կառավարությունում աշխատող էմիրի մի շարք ազգականների համար:
Քննադատությունների ալիքի տակ են հայտնվել ֆինանսների, աշխատանքի և սոցիալական քաղաքականության, նավթի, պաշտպանության և ներքին գործերի նախարարները: Նրանց մի մասը ստիպված է եղել հրաժարական տալ:
Քուվեյթում խորհրդարանն իրական իշխանություն չունի, սակայն կարող է արգելափակել որոշ օրինագծեր: Երկրի կառավարությունը նշանակվում է անձամբ էմիրի կողմից . պատասխանատու է նրա առաջ: Արտասահմանյան դիտորդների տվյալներով՝ 2012թ. փետրվարի ընտրություններն անցել են առանց զգալի խախտումների և միջազգային ստանդարտներին համապատասխան:
Նախորդ խորհրդարանի կազմում գերակշռում էին էմիրի կողմնակիցները:
